ზვიად შალამბერიძე - ჭიათურის მერია ითხვისში მცხოვრებ დაზარალებულ ოჯახებს დროებით ალტერნატიული ფართით უზრუნველყოფს
იმერეთში სახელმწიფო რწმუნებულმა, ზვიად შალამბერიძემ ჭიათურის მერთან, გივი მოდებაძესთან ერთად, სოფელ ითხვისში დაზიანებული სახლები დაათვალიერა, დაზარალებულ მოსახლეობას შეხვდა და მათგან ინფორმაცია პირადად მოისმინა. ინფორმაციას ამის შესახებ ქუთაისის მერია ავრცელებს.
მათივე ცნობით, ამ ეტაპზე 12 ოჯახი გადაუდებელ დახმარებას საჭიროებს.
ხელისუფლების წარმომადგენლების განცხადებით, შესაბამისი ღონისძიებები გატარდა, რის შედეგადაც გადაწყდა, რომ ჭიათურის მერია დაზარალებულ ოჯახებს დროებით ალტერნატიული ფართით უზრუნველყოფს.
„ხელისუფლებამ პირველივე დღიდან შესაბამისი ზომები მიიღო. ის ოჯახები, რომელსაც საფრთხე ყველაზე მეტად ემუქრება, თავიანთი საცხოვრებელი სახლებიდან უკვე გაყვანილია. მათთვის ალტერნატიული სახლები გამოვყავით, როგორც სხვადასხვა სოფელში, ასევე ჭიათურაში.
გეოლოგიური ჯგუფი უკვე მუშაობს, რომელიც სიტუაციას შეისწავლის და დაადგენს, თუ რამდენად უსაფრთხოა აქ ცხოვრება“, - აღნიშნა ზვიად შალამბერიძემ.
ქუთაისის მერიის ცნობით, გეოლოგიური პრობლემების წარმოშობის მიზეზებზე შესაბამისი ღონისძიებების გატარება უკვე დაიწყო. სპეციალისტები დასკვნას სამუშაო პროცესის დასრულების შემდეგ დადებენ.
სოფელ ითხვისში ე.წ. „მახათაძეების უბანში“ 12 სახლი მნიშვნელოვნად დაზიანებულია.
v-if="article.gallery" v-html="article.gallery"
