ბათუმის საქალაქო სასამართლომ “ნაციონალური მოძრაობის” სარჩელი “ქართული ოცნების” მაჟორიტარი კანდიდატის რეგისტრაციიდან მოხსნის თაობაზე არ დააკმაყოფილა
ბათუმის საქალაქო სასამართლომ “ერთიანი ნაციონალური მოძრაობის” სარჩელი “ქართული ოცნების” მაჟორიტარი კანდიდატის რამაზ ჯინჭარაძის რეგისტრაციიდან მოხსნის თაობაზე არ დააკმაყოფილა. მოსამართლემ მხარეებს განუმარტა, რომ საკმარისი მტკიცებულება მოსარჩელე მხარემ ვერ წარადგინა.
“ერთიანი ნაციონალური მოძრაობის” წევრები აცხადებენ, რომ “ქართული ოცნების” სასამართლოსგან სხვა მოლოდინი არ ჰქონდათ. მათივე თქმით, მოსახლეობას მოუწოდებენ, რომ შუალედურ არჩევნებში ოპოზიციას დაუჭირონ მხარი, რადგან “ქართული ოცნება” ყაჩაღური გზით არჩევნების მოპარვას ცდილობს.
ბათუმის 79-ე საოლქო საარჩევნო კომისიის იურისტს მიაჩნია, რომ სასამართლომ სწორი და დასაბუთებული გადაწყვეტილება მიიღო.
“სასამართლოს ამ გადაწყვეტილებას საოლქო საარჩევნო კომისია ველოდებოდით, ვინაიდან როგორც პროცესზე აღვნიშნე და მოსამართლემაც სწორედ ამაზე გააკეთა განმარტება, მოსარჩელის მიერ არ იყო წარმოდგენილი უტყუარი და საკმარისი მტკიცებულება, რომლითაც დადასტურდებოდა ამომრჩევლის მისყიდვის ფაქტი”,- აცხადებს ოლქის იურისტი ზვიად სურმანიძე.
