მდინარეები ოცხე და ბარათხევი კალმახის 60 000-მდე ქვირითით დათევზიანდა
ველური ბუნებისა და დაცული ტერიტორიების სააგენტოს სპეციალისტებმა, ბორჯომ-ხარაგაულის ეროვნული პარკის ტერიტორიაზე, მდინარე ოცხე და ბარათხევი 60 000-მდე კალმახის ქვირითით დაათევზიანეს. ამის შესახებ ინფორმაციას ველური ბუნების სააგენტო ავრცელებს.
მათივე ინფორმაციით, სახეობების გამრავლების ხელშეწყობის აღნიშნული მეთოდი მსოფლიოს არაერთ ქვეყანაშია აპრობირებული, რადგან ასე გამოჩეკილი ლიფსიტი ველურ ბუნებაში მარტივად ახდენს ადაპტაციას. ამასთან, მდინარის კალმახის ინკუბირებული ქვირითისა და ლარვის ველურ ბუნებაში გაშვება არის მეთოდი, რომელიც ხელს უწყობს, ადამიანის მინიმალური ჩარევით, მოწყვლადი სახეობის მომრავლებას და მაქსიმალურად ზრდის ბუნებრივად გამოჩეკვის პროცენტს. ქვირითი ნაყოფიერდება ხელოვნურად, გამოჩეკვამდე მდინარის ინკუბატორში თავსდება და წყლის მდორე უბეებში ეწყობა.
,,გარემოს დაცვისა და სოფლის მეურნეობის სამინისტროს ველური ბუნების ეროვნული სააგენტო ადგილობრივი ფაუნის სახეობათა მხარდაჭერისა და ბუნებაში აღდგენის პროექტს 2016 წლიდან ახორციელებს. სააგენტოს საშენში, ყოველწლიურად, ნახევარი მილიონი მდინარის კალმახის სხვადასხვა აუზის პოპულაციის ლიფსიტის წარმოება და მდინარეების დათევზიანება ხდება საქართველის წითელი ნუსხის სახეობის აღდგენის მიზნით“, - ნათქვამია ინფორმაციაში.
