ძლიერი წვიმის შედეგად, ონის მუნიციპალიტეტის სოფელ სორგითში მეწყრული პროცესები გააქტიურდა. მთიდან ჩამოწოლილმა მასამ სოფელში მისასვლელი საავტომობილო გზა დააზიანა. ინფორმაციას მუნიციპალიტეტის მერია ავრცელებს.
მათივე ინფორმაციით, მეწყერმა მუნიციპალიტეტის ცენტრს საავტომობილო გზის გარკვეული მონაკვეთი სრულად მოწყვიტა.
მერიაში აცხადებენ, რომ საჭიროა მთიდან ჩამოწოლილი ნაშალი მასის წმენდა, დროებითი გზის მოწყობა და შემდგომ ნაპირსამაგრი ღონისძიებების დაგეგმვა - განხორციელება.
რაჭა-ლეჩხუმ ქვემო სვანეთის სახელმწიფო რწმუნებულის პირველი მოადგილე გიორგი მაქარაშვილი, ონის მუნიციპალიტეტის მერი სერგი ხიდეშელი და მერის მოადგილე ლევან შერაზადიშვილი ადგილზე იმყოფებოდნენ და შექმნილ ვითარებას გაეცნენ.
ონის მუნიციპალიტეტის მერის სერგი ხიდეშელის განცხადებით, ამ ეტაპზე მიმდინარეობს ცხმორი - ღუნდის დამაკავშირებელი ალტერნატიული შემოვლითი საფეხმავლო გზის აღდგენითი სამუშაოები, მობილიზებულია სპეცტექნიკა და ადგილობრივი ხელისუფლების წარმომადგენლები აქტიურ კომუნიკაციაში არიან სოფლის მოსახლეობასთან.
„დაზიანებული გზის მონაკვეთთან დაკავშირებით საჭიროა გეოლოგიური კვლევა, რომელიც უახლოეს პერიოდში ჩატარდება. მათ მიერ გაცემული რეკომენდაციების საფუძველზე მოხდება გზის სარეაბილიტრაციო სამუშაოების განხორციელება”, - აცხადებენ ონის მერიაში.