ქუთაისის მერმა იოსებ ხახალეიშვილმა, სახელმწიფო რწმუნებულმა იმერეთში ზვიად შალამბერიძემ და ადგილობრივიხელისუფლების წარმომადგენლებმა 9 აპრილის მემორიალთან პატივი მიაგეს თავისუფლებისთვის დაღუპული გმირების ხსოვნას.

ქუთაისის მერიის ინფორმაციით, ქალაქის ცენტრალურ ბულვარში დამოუკიდებლობის დღისადმი მიძღვნილი გამოფენა და მოსწავლეთა პერფორმანსი გაიმართა.

„9 აპრილი ჩვენი ქვეყნის თანამედროვე ისტორიაში უმნიშვნელოვანესი თარიღია. 1989 წლის 9 აპრილს ქართველმა ხალხმა გამოხატა თავისი სწრაფვა დამოუკიდებლობისაკენ, ორი წლის შემდეგ კი, ზუსტად ამ დღეს, ჩვენ უკვე ოფიციალურად გამოვაცხადეთ საქართველოს დამოუკიდებლობის აღდგენა. მადლობა გმირებს, თავისუფლებისთვის!

ჩვენ ვალდებული ვართ, მათ მიერ დაწყებული საქმე ბოლომდე მივიყვანოთ და საქართველო იყოს ერთიანი, ძლიერი და დამოუკიდებელი ქვეყნა!“ - განაცხადა იოსებ ხახალეიშვილმა.

ქუთაისის მერის თქმით კი, 9 აპრილის მოვლენებმა აჩვენა, რომ ქართველ ხალხს შიშველი ხელებით შეუძლია აღუდგეს ტანკებს, როდესაც საქმე საქართველოს დამოუკიდებლობას ეხება.

„საქართველოს თავისი ისტორიის მანძილზე არაერთი გმირობის მაგალითი ახსოვს და სწორედ ასეთია ჩვენი ქვეყნის უახლოეს ისტორიაში 9 აპრილი. 33 წლის წინ განვითარებულმა მოვლენებმა აჩვენა, რომ ქართველ ხალხს შიშველი ხელებით შეუძლია აღუდგეს ტანკებს, როდესაც საქართველოს სიყვარულს და საქართველოს დამოუკიდებლობას ეხება საქმე. განსაკუთრებით დღევანდელ დღეს, როდესაც მსოფლიოში ასეთი გეოპოლიტიკური ვითარება გვაქვს, იმ ადამიანების თავგანწირვით მოპოვებული თავისუფლება კიდევ უფრო მეტ ფასს იძენს. ჩვენი და ჩვენი შთამომავლობის ვალია, გავუფრთხილდეთ ქვეყნის დამოუკიდებლობას და თავისუფლებას“, - განაცხადა ზვიად შალამბერიძემ.