ბათუმის მერიის ინფორმაციით, მიმდინარე წელს ქალაქში ექსპლუატაციაში ოთხი ახალი საბავშვო ბაღი შევა.

სამუშაოები დღეს ბათუმის მერმა, არჩილ ჩიქოვანმა დაათვალიერა.

მუნიციპალიტეტის მერიის ინფორმაციით, სკოლამდელი აღზრდის დაწესებულება საერთაშორისო სტანდარტების შესაბამისად შენდება, რომელიც 300-მდე ბავშვზეა გათვლილი.

გარდა შიდა ინფრასტრუქტურისა, ეზო კეთილმოეწყობა და საბავშვო ატრაქციონები დამონტაჟდება.

ამ ეტაპისთვის, შენობის საძირკვლის მოწყობის სამუშაოები მიმდინარეობს. საბავშვო ბაღის მშენებლობა მიმდინარე წლის ოქტომბერში უნდა დასრულდეს. პროექტის ღირებულება 2 მილიონ 574 ათას ლარს შეადგენს.

„ბაგრატიონის ქუჩაზე, ახალი საბავშვო ბაღის მშენებლობა წარმატებით მიმდინარეობს. დამატებით, ქათამაძისა და მეზღვაურთა ქუჩებზე, კიდევ ორი ახალი ბაღი შენდება. საბავშვო ბაღების მშენებლობა, პირველ რიგში, იმ უბნებში დაიგეგმა, სადაც მოთხოვნა განსაკუთრებით დიდი იყო. მნიშვნელოვანია, რომ წელს ექსპლუატაციაში ოთხი ახალი ბაღი შევა“, - განაცხადა ბათუმის მერმა, არჩილ ჩიქოვანმა.