ქუთაისში, #EU4Culture-ის პროექტის ფარგლებში, ქალაქის კულტურის განვითარების სტრატეგიის დოკუმენტის პირველი სამუშაო ვერსიის წარდგენა და განხილვა მოეწყო. ამის შესახებ ინფორმაციას ქუთაისის მერია ავრცელებს.

მათივე ცნობით, დოკუმენტის სამუშაო ვერსიის განხილვა ქალაქის კულტურის და შემოქმედებითი ინდუსტრიების წარმომადგენლებთან გაიმართა.

ამასთან, ქუთაისის ტურიზმის საინფორმაციო ცენტრში შეხვედრა შედგა რამდენიმე სექტორთან: მაუწყებლობა, მედია და რეკლამა, კულტურული ტურიზმი და გასტრონომია; არქიტექტურა, სახვითი ხელოვნება, რეწვა, დიზაინი, ციფრული ტექნოლოგიები და ვიდეო თამაშები, კინო და ვიდეო ხელოვნება, მუსიკა, კულტურული მემკვიდრეობა, საშემსრულებლო ხელოვნება, ლიტერატურა და საგამომცემლო საქმე.

ქუთაისის მერიის ინფორმაციითვე, კულტურის სტრატეგიის განხილვაზე, ფოკუს-ჯგუფების წარმომადგენლებმა, საკონსულტაციო ორგანიზაციის Creative Solution აღმასრულებელ დირექტორ ზვიად მჭედლიშვილთან ერთად, იმსჯელეს დოკუმენტის ძირითად მიმართულებებსა და კონკრეტულ თემებზე, გამოითქვა სურვილები და შენიშვნები, რომელთა გათვალისწინება ქუთაისის კულტურის სტრატეგიის საბოლოო ვერსიაში მიზანშეწონილი იქნება.