რუსთავის მერი ნინო ლაცაბიძე ბრიუსელში ოფიციალური ვიზიტით იმყოფება, სადაც ენერგოქალაქების ფორუმში იღებს მონაწილეობას. ამის შესახებ ინფორმაციას რუსთავის მერია ავრცელებს.
მათივე ცნობით, ფორუმს, მსოფლიოს 30-მდე ქვეყნის ასობით ქალაქის წარმომადგენელი ესწრება, საქართველოს კი მხოლოდ რუსთავი წარმოადგენს.
“ ჩვენი ქალაქისთვის გამოვიყენებთ როგორც ადგილობრივ, ასევე საერთაშორისო მხარდაჭერას, რათა ახალი პროექტებით შევძლოთ იმ მიზნის მიღწევა, რაც ყველას გვაერთიანებს. რუსთავისთვის ეკოლოგია მთავარ გამოწვევად რჩება, ენერგოქალაქების ქსელი არის შესაძლებლობა, გავიზიაროთ საუკეთესო პრაქტიკა და საერთაშორისო მხარდაჭერით ეკოლოგიურად ძლიერ და ენერგოეფექტურ ქალაქად ჩამოვყალიბდეთ", - განაცხადა ბრიუსელში გამგზავრებამდე ნინო ლაცაბიძემ.
როგორც რუსთავის მერიის ინფორმაციაშია აღნიშნული, რუსთავის მერიამ, მერების შეთანხმების გაგრძელების ფაზას, ხელი 2020 წელს მოაწერა, რომლის ვალდებულება ქალაქთან ერთად, უკვე ქვეყანასაც გააჩნია. პარიზის შეთანხმებით, საქართველოს მთავრობამ ქვეყნის ტერიტორიაზე 2030 წლისთვის, CO2 ემისიების 30 %-ით შემცირების ვალდებულება აიღო. ამ ეტაპზე, სამოქმედო გეგმის შემუშავება მიმდინარეობს და პროცესში რუსთავი აქტიურადაა ჩართული.