პოლიციელზე თავდასხმის ბრალდებით დაკავებული 5 პირიდან ორი ფოთში, დროებითი მოთავსების იზოლატორშია გადაყვანილი. მათ ბრალი დღეს წარუდგინეს.
ადვოკატების განცხადებით, მათი დაცვის ქვეშ მყოფი პირები თავს დამნაშავედ არ ცნობენ.
„წარდგენილ ბრალდებას არ აღიარებენ, თავს არ ცნობენ დამნაშავედ და აბსოლუტურად, კატეგორიულად სხვა ვითარებაში აღწერენ მოვლენას, რაც პირდაპირ მიუთითებს პოლიციელის მხრიდან პროვოცირებას. ბილწსიტყვაობა მოდის პოლიციელისგან და შესაბამისად ახალგაზრდები ამაზე ადეკვატურად პასუხობენ“, - განაცხადა ერთ-ერთი ბრალდებულის, გ.ჭ -ს ადვოკატმა ლაშა ხოშტარიამ.
რაც შეეხება მეორე ბრალდებულს, ის დუმილის უფლებას იყენებს.
„ჩემი დაცვის ქვეშ მყოფი, ბრალდებული გიორგი წულეისკირია. მას წარედგინა ბრალდება, სისხლის სამართლის კოდექსის 353-ე პრიმა მუხლის პირველი ნაწილით, პოლიციელზე სამსახურებრივი მოვალეობის შესრულების დროს თავდასხმა. ის თავს დამნაშავედ არ ცნობს, არანაირი შემხებლობა ამ დანაშაულთან არ ჰქონია. ამ ეტაპისთვის დუმილის უფლებას იყენებს და სხვას ვერაფერს ვიტყვი", -განაცხადა ადვოკატმა რომან მამულიამ.
შეგახსენებთ, საპატრულო პოლიციის თანამშრომლის ცემის ბრალდებით 24 აპრილს სამი პირი დააკავეს. შემთხვევა სენაკის ცენტრში, რკინიგზის სადგურის მიმდებარედ მოხდა.