ქუთაისის მერი იოსებ ხახალეიშვილი ნიკეას ქუჩის N7 ჩიხში, საგზაო-ინფრასტრუქტურული სამუშაოების მიმდინარეობას გაეცნო. ინფორმაციას ამის შესახებ ქუთაისის მუნიციპალიტეტის მერია ავრცელებს.

მათივე ცნობით, ნიკეას ქუჩის მე-7 ჩიხში დაწყებულია გზის კაპიტალური შეკეთება. ქუჩაზე გზის საფარი მთლიანად შეიცვლება, ტროტუარები და სანიაღვრე სისტემა მოეწყობა.

სამუშაოებს შპს „დაგი+“ ასრულებს. ნიკეას ქუჩის მე-7 ჩიხის რეაბილიტაციისთვის 416 624 ლარია გამოყოფილი და ევროკავშირის საგრანტო კონკურსის ფარგლებში ფინანსდება. გზის რეაბილიტაცია მაისის ბოლოს დასრულდება.

„ქუთაისში ევროკავშირის საგრანტო პროექტების განხორციელება აქტიურად მიმდინარეობს. დღეს ვიმყოფებოდით ნიკეას ქუჩის მე-7 ჩიხში, სადაც სწორედ ამ პროექტით დაფინანსდა გზის რეაბილიტაცია. ეს გზა ათწლეულებია არ შეკეთებულა. ამ ქუჩის საგზაო ინფრასტრუქტურის მოსაწესრიგებლად 400 000 ლარზე მეტი დაიხარჯება. ასფალტო-ბეტონის საფარი განახლდება, ტროტუარები და სანიაღვრე სისტემა გაკეთდება.

რეაბილიტაციის შემდეგ, ჩვენს მოქალაქეებს და ბიზნეს-სექტორს, რომლებიც ამ ქუჩით სარგებლობენ, ქალაქის სხვა უბნებთან დაკავშირება მნიშვნელოვნად გაუადვილდებათ,“- განაცხადა იოსებ ხახალეიშვილმა.