სიმართლეს არ შეესაბამება, რომ გერმანია ლიდერობას არ ავლენდა უკრაინისთვის მძიმე შეიარაღების მიწოდების მცდელობებში - ამის შესახებ გერმანიის კანცლერმა ოლაფ შოლცმა, ოფიციალური კიევისთვის მძიმე შეიარაღების გაგზავნასთან დაკავშირებით, მისი ქვეყნის მიმართ გამოთქმული კრიტიკის საპასუხოდ განაცხადა. ინფორმაცის „გარდიანი“ გერმანული გამოცემა „Bild am Sonntag“-ზე დაყრდნობით ავრცელებს.

მედიის ცნობით, შოლცი ზეწოლას განიცდის როგორც შიდა, ისე საერთაშორისო დონეზე, რათა უკრაინას ისეთი მძიმე შეიარაღება მიაწოდოს, როგორიცაა ტანკები და ქვემეხები და მხარი დაუჭიროს ევროკავშირის ემბარგოს რუსული ენერგორესურსების იმპორტზე.

”მე ჩემს გადაწყვეტილებებს ვიღებ სწრაფად და ჩვენს პარტნიორებთან ერთად”,- დასძინა შოლცმა.

ამასთან, ოლაფ შოლცმა კომენტარი გააკეთა გამოკითხვებთან დაკავშირებითაც, რომლის თანახმად, გერმანელების დიდი ნაწილის შოლცის პოლიტიკით უკმაყოფილოა.

„გათვალისწინებულ უნდა იქნას გამოკითხვების [შედეგები], მაგრამ მათზე დაყრდნობით არ უნდა განხორციელდეს ქმედებები, განსაკუთრებით ომისა და მშვიდობის საკითხებში, რაც უკიდურესად საშიში იქნება”, - განაცხადა გერმანიის კანცლერმა აღნიშნულ საზოგადოებრივი აზრის კვლევასთან დაკავშირებით.

„Bild am Sonntag“-ში გამოქვეყნებულმა ბოლოდროინდელმა გამოკითხვამ აჩვენა, რომ გერმანელების 54% შოლცის მიერ კრიზისთან გამკლავებით უკმაყოფილოა.