რუსული ძალების მიერ სავარაუდო ომის დანაშაულებებთან დაკავშირებით, სულ 9 158 სისხლის სამართლის საქმეზე გამოძიება მიმდინარეობს. შემთხვევები კიევის, ჩერნიგოვისა და სუმის რეგიონებს მოიცავს - ამის შესახებ უკრაინის გენერალურმა პროკურორმა ირინა ვენედიქტოვამ განაცხადა.
„ჩვენ უკვე დავადგინეთ კონკრეტული სამხედრო დამნაშავეების ვინაობა. მაგალითად, 15 მათგანი კიევის რეგიონშია, ბუჩაში - 10. ჩვენ მათ პასუხს ვაგებინებთ წამების, გაუპატიურებისა და ძარცვისთვის", - აღნიშნა უკრაინის გენპროკურორმა.
ვენედიქტოვამ დასძინა, რომ ბუჩაში ზოგიერთი ცხედრის იდენტიფიცირება შეუძლებელია და დნმ-ის ნიმუშები გროვდება. „სამწუხაროდ, გვაქვს საფუძველი ყოველდღიურად აღვძრათ ახალი საქმეები - მშვიდობიანი მოსახლეობის დაღუპვის, დაბომბვის, ჩვენი მოქალაქეებისა და ბავშვების ოკუპირებულ ტერიტორიებზე და აგრესორი სახელმწიფოს ტერიტორიაზე დეპორტაციის შესახებ და ა.შ“, - განაცხადა ვენედიქტოვამ.
უკრაინის გენერალურმა პროკურორმა აღნიშნა, რომ მისი ქვეყანა გამოძიების პროცესში საერთაშორისო დახმარებას იღებს.
"ახლა ჩვენ გვყავს ფრანგი ექსპერტების გუნდი და ექსპერტები სლოვაკეთიდან. მომავალ სამშაბათს ველოდებით ექსპერტებს ლიეტუვიდან", - დასძინა მან.