სამხრეთ კორეის ელჩი საელჩოს რამდენიმე თანამშრომელთან ერთად კიევში დაბრუნდა, - ინფორმაციას ადგილობრივო მედია ქვეყნის საგარეო საქმეთა სამინისტროზე დაყრდნობით ავრცელებს.
მათივე ინფორმაციით, ელჩი კიევიდან მუშაობას დღეიდან დაიწყებს და დარჩენილი პერსონალის ეტაპობრივ დაბრუნებას უსაფრთხოების სიტუაციის შესაბამისად განიხილავენ.
სამხრეთ კორეის საელჩოს ევაკუაცია რუსეთის შეჭრის დასაწყისში განხორციელდა და თანამშრომლები მარტიდან დასავლეთ უკრაინის ქალაქ ჩერნივცში განთავსებული დროებითი ოფისიდან მუშაობენ.
უკრაინის დედაქალაქში მუშაობა უკვე 20-ზე მეტმა საელჩომ, მათ შორის ევროკავშირის, გაერთიანებული სამეფოს, საფრანგეთის, ესპანეთის, იტალიისა და ნიდერლანდების საელჩომ, განაახლა.
შეერთებული შტატების სახელმწიფო მდივანმა, ანტონი ბლინკენმა გასულ კვირას კიევში ვიზიტის დროს განაცხადა, რომ ამერიკელი დიპლომატები ეტაპობრივად დაიწყებენ ქვეყანაში დაბრუნებას.