უკრაინის აღმოსავლეთში სიტუაციის შესამსუბუქებლად გადასადგმელი ნაბიჯების გადაწყვეტის ადგილი ანკარა ან სტამბოლი იქნება, - თურქული მედიის ინფორმაციით, ამის შესახებ პრეზიდენტმა რეჯეფ თაიფ ერდოღანმა განაცხადა.

თურქეთის პრეზიდენტის თქმით, მისი პრესმდივანი იბრაჰიმ კალინი და თურქეთის საგარეო საქმეთა მინისტრის მოადგილე სედათ ონალი შაბათს ერთად გაემგზავრნენ კიევში, სადაც გამართეს შეხვედრები უკრაინის პრეზიდენტ ვოლოდიმირ ზელენსკისთან და ქვეყნის ხელისუფლების სხვა წარმომადგენლებთან.

„ალბათ, ამ კვირაში გვექნება მოლაპარაკებები ბატონ პუტინთან. მაინტერესებს როგორ დავაჩქაროთ ევაკუაცია, მაგალითად, მარიუპოლში, როგორ ვიპოვოთ ამ საკითხის გადაწყვეტა და შევეცდებით ამის გაკეთებას“, - განაცხადა ერდოღანმა.

მისი თქმით, თურქეთი ყველა ღონეს მიმართავს რუსეთისა და უკრაინის ლიდერების შეხვედრის ორგანიზებისთვის.