წალენჯიხაში საქართველოს მესამე პრეზიდენტის მიხეილ სააკაშვილის ოჯახს სოლიდარობა გამოუცხადეს. მხარდასაჭერი აქცია „ერთიანი ნაციონალური მოძრაობის" ორგანიზებით გაიმართა. როგორც წალენჯიხის მერმა გია ხარჩილავამ განაცხადა, ისინი მიხეილ სააკაშვილის ოჯახის გვერდით დგანან.

„მხარდაჭერას ვუცხადებთ მიხეილ სააკაშვილის ოჯახს, მიხეილ სააკაშვილის სიცოცხლის უზრუნველყოფისათვის და თავისუფლების უზრუნველყოფისთვის ბრძოლაში, „ერთიანი ნაციონალური მოძრაობის" სახელით, რომელიც ერთგული დარჩა იმ ღირებულებებისადმი, რომელიც გულისხმობს დასავლეთს, ცივილიზებულ სამყაროს და დემოკრატიის მონაპოვარს.

მოვუწოდებ ყველას იმგვარი აქტიურობისკენ, რომ ჩვენმა პოლიტიკურმა აქტიურობამ შეუქმნას ხელისუფლებას ის პირობა, რომ სასწრაფოდ იყოს გადაწყვეტილი ეს მნიშვნელოვანი ისტორიული საკითხი, მიხეილ სააკაშვილის სიცოცხლის უზრუნველყოფა, თავისუფლების უზრუნველყოფა და ზოგადად ქვეყანაში იმ ტიპის სასამართლო სისტემის უზრუნველყოფა, რომელსაც შემდგომში ენდობა ქვეყანა, მოსახლეობა და თაობები",- განაცხადა გია ხარჩილავამ.