მიხეილ სარჯველაძე - არავითარი საფუძველი იმისა, რომ მიხეილ სააკაშვილი პატიმრობიდან ჯანმრთელობის მდგომარეობის გამო გათავისუფლდეს და სასჯელის მოხდა გადაუვადდეს, ობიექტურად არ არსებობს

არავითარი საფუძველი იმისა, რომ მიხეილ სააკაშვილი პატიმრობიდან ჯანმრთელობის მდგომარეობის გამო გათავისუფლდეს და სასჯელის მოხდა გადაუვადდეს, ობიექტურად არ არსებობს - მაშინ რა დააშავა ყველა სხვა პატიმარმა, რომელთათვისაც საპატიმრო დაწესებულებაში ყოფნა დიდი ფსიქოლოგიური სტრესია?! - ამის შესახებ ჟურნალისტებთან პარლამენტის ადამიანის უფლებათა დაცვის კომიტეტის თავმჯდომარემ მიხეილ სარჯველაძემ განაცხადა.

მისივე თქმით, თუკი ვინმესთვის მიხეილ სააკაშვილის ციხეში ყოფნა ფსიქოლოგიურად მიუღებელია, ხოლო ეს ყველაფერი ოჯახის წევრებისათვის არის მძიმე, ამის მიუხედავად, არ შეიძლება გადაწყვეტილებები არა სამართლებრივი გზებით, არამედ პოლიტიკური მიზანშეწონილობის მიხედვით მიიღებოდეს.

ამასთან, როგორც სარჯველაძემ აღნიშნა, არ ფლობს ინფორმაციას უმრავლესობის დეპუტატების საპატიმრო დაწესებულებაში შესვლისა და ვითარების ადგილზე შესწავლის შესახებ. პარლამენტის ადამიანის უფლებათა დაცვის კომიტეტის თავმჯდომარე ამბობს, რომ ამის საჭიროება არ არსებობს.

„მიმდინარე პროცესებს თვალს ვადევნებთ და თუ საჭიროება იქნება, პენიტენციურ დაწესებულებაში შეიძლება შევიდეთ კიდეც. თუ ამის საჭიროება არ იქნება, თვითმიზნად არავინ დაისახავს.

რაც შეეხება ოჯახის წევრებისა და მომხრეების განცხადებას იმის თაობაზე, რომ ჯანმრთელობის მდგომარეობა არის მძიმე და აქედან გამომდინარე, მისი გათავისუფლების საკითხი უნდა დადგეს, როდესაც ჯანმრთელობის მდგომარეობაზეა საუბარი კითხვები შესაბამისი კვალიფიკაციის მქონე ადამიანებთან ანუ ექიმებთან უნდა დაისვას, ვინც პროცესში უშუალოდ არიან ჩართული. არ შეიძლება პოლიტიკოსები და იურისტები აფასებდნენ საკითხს იმის შესახებ, როგორი და რამდენად დამაკმაყოფილებელია ჯანმრთელობის ხარისხი. როდესაც ექიმთა კონსილიუმის რეკომენდაციებთან დაკავშირებით დაისვა კითხვა უცხოეთში გაყვანის საკითხზე, მათ თქვეს, რომ ამის აუცილებლობა არ იყო და ასეთ რეკომენდაციას არ სწევენ. ექიმების პოზიციის მიუხედავად, იგივე მოთხოვნების წამოყენება გრძელდება.

ჯანმრთელობის მდგომარეობა გაუარესებულია, ამას თავისი წინაპირობები აქვს, არის მკურნალობადი და მკურნალობა პენიტენციური დაწესებულების შიგნით მოხერხებადია. თუ პრიორიტეტია არა მიხეილ სააკაშვილის თავისუფლების მიღწევა, არამედ მისი ჯანმრთელობის მდგომარეობა, ამისთვის საჭიროა მოვუწოდოთ, რომ რეკომენდებული მკურნალობის წესებს დაემორჩილოს და მიიღოს ცილა. საკითხის გადაწყვეტა მარტივია და ამის გამო შორს მიმავალი გეგმების დასახვა არ შეიძლება.

არსებობს თვითდაზიანების პრაქტიკა და რა ვქნათ - წავახალისოთ და ვინც თვითდაზიანებას მიიღებს, ყველა გარეთ გავიდეს?!“, - განაცხადა მიხეილ სარჯველაძემ.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს