მდინარე მუხრაზე მიმდინარე სტიქიის სალიკვიდაციო სამუშაოები, დღეს ლენტეხის მუნიციპალიტეტის მერის მოადგილე ბერდია ჩანქსელიანმა, ზედამხედველობის განყოფილების თანამშრომლებთან ერთად დაათვალიერა.

ლენტეხის მუნიციპალიტეტის ინფორმაციით, ამ ეტაპზე მიმდინარეობს სოფელ მუწდისთან დამაკავშირებელი საავტომობილო ხიდის გამაგრებისა და მდინარე მუხრის კალაპოტის გასწორება-ჩაღრმავების სამუშაოები.

მოსახლეობა შეუფერხებლად გადაადგილდება ალტერნატიული გზით.

შეგახსენებთ, რომ 26 აპრილს ლენტეხის მუნიციპალიტეტის სოფელ ტვიბში, მთებში თოვლის დნობის შედეგად, მდინარე მუხრა ადიდდა, კალაპოტიდან გადმოვიდა და დააზიანა როგორც საავტომობილო, ისე საფეხმავლო გზა.

სტიქიის სალიკვიდაციო სამუშაოები გრძელდება.