პენტაგონის პრესსპიკერის, ჯონ კირბის განცხადებით, შეერთებული შტატები მუშაობს ფინეთისა და შვედეთის ნატო-ში შესაძლო გაწევრიანებასთან დაკავშირებით თურქეთის პოზიციის უკეთ გასაგებად.
„თურქეთი ნატო-ს ღირებული მოკავშირეა, ეს არ შეცვლილა. ისინი ჩართულები არიან რუსეთსა და უკრაინას შორის დიალოგის დაწყების მცდელობაში და მათ დახმარება გაუწიეს უკრაინას. ასე რომ, ალიანსში მათ პოზიციაში არაფერი იცვლება“, - აღნიშნა პენტაგონის პრესსპიკერმა.
ამასთან, თეთრ სახლში აცხადებენ, რომ ვაშინგტონი "მუშაობს თურქეთის პოზიციის გარკვევაზე.“
„იდეამ, რომ ეს ორი ქვეყანა ტრანსატლანტიკური ალიანსის წევრი გახდეს, ფართო მხარდაჭერა მიიღო ნატო-ს წევრი ქვეყნებისგან", - აღნიშნა თეთრი სახლის პრესსპიკერმა ჯენ ფსაკიმ.
შეგახსენებთ, თურქეთის პრეზიდენტმა, რეჯეფ თაიფ ერდოღანმა სტამბოლში ჟურნალისტებს განუცხადა, რომ ნატოში შვედეთისა და ფინეთის გაწევრიანების პერსპექტივის მიმართ თურქეთი დადებითად განწყობილი არ არის.
