ზესტაფონში მარგვეთისა და უბისის მიტროპოლიტის, მეუფე მელქისედეკის წინააღმდეგ აქცია გაიმათა. მრევლის ნაწილი რეზიდენციის კარის აჭედვას ცდილობდა, რისი უფლებაც სამართალდამცველებმა არ მისცეს.
პროტესტის მონაწილეების განცხადებით, მეუფე სოდომურ ცოდვაში მხილებულ პირებს მღვდლებად აკურთხებს, რაც მათთვის შეურაცხმყოფელია. აქციის მონაწილეები მოითხოვენ, მეუფემ ეპარქია დატოვოს.
მსგავსი ბრალდებით მეუფე მელქისედეკის წინააღმდეგ აქცია რამდენჯერმე გაიმართა. ბრალდებებს არ ადასტურებს მეუფე მელქისედეკი. მისი თქმით, ეს არის ეკლესიის წინააღმდეგ მართული აქცია და მათ პასუხი საპატრიარქომ გუშინდელი განცხადებით გასცა. მისივე თქმით, აქციის მონაწილეები სასაუბროდ გუშინ დაიბარა, თუმცა მათ შეხვედრა არ ისურვეს.
შეგახსენებთ, რომ გუშინ საპატრიარქომ განცხადება გაავრცელა. საპატრიარქო აცხადებს, რომ ინფორმაცია, მარგვეთისა და უბისის ეპისკოპოს მელქისედეკის დასჯისა და ხელდასხმის უფლების შეჩერების შესახებ, სიმართლეს არ შეესაბამება.