ტელეკომპანია „მთავარი არხის” მხარდამჭერი აქცია გაიმართა გორის ცენტრში. აქციის მონაწილე მედიის წარმომადგენლები და პარტია „ერთიანი ნაციონალური მოძრაობის” წევრები აცხადებენ, რომ მათი მოსაზრებით, გვარამიას იმ კრიტიკული სიუჟეტების გამო მიუსაჯეს პატიმრობა, რაც „მთავარი არხის“ ეთერში გადიოდა.
„დღეს, „ქართული ოცნების“ მოსამართლემ მიიღო არასწორი გადაწყვეტილება, ეს არის პოლიტიკური დაკვეთა და შესაბამისად, ნიკა გვარამია გახლავთ პოლიტიკური პატიმარი. ბიძინა ივანიშვილი და მისი ხელისუფლება ებრძვის თავისუფალ მედიას და თავისუფალ სიტყვას, სწორედ ამ ფაქტის გასაპროტესტებლად შევიკრიბეთ აქ“, - განაცხადა „ნაციონალური მოძრაობის“ გორის ორგანიზაციის ხელმძღვანელმა და გორის მუნიციპალიტეტის საკრებულოს წევრმა კახაბერ ლობჟანიძემ.
„ვთვლი, რომ დღეს არ აქვს მნიშვნელობა, ვინ ვისიანია, მე აქ მოვედი ჩემი კოლეგების სოლიდარობის ნიშნად და შევუერთდი ამ აქციას“, - განაცხადა „ტვ მონიტორინგის“ საინფორმაციო სამსახურის ხელმძღვანელმა ნიკა გაბლიშვილმა.