გიორგი შაქარაშვილის მიმართ განხორციელებულ ჯგუფურ ძალადობასა და მასში მონაწილეობაში მსჯავრდებული არასრულწლოვნებიდან ორი - გიორგი მერებაშვილი და ლაშა შერმადინი თბილისის სააპელაციო სასამართლოში ხელახლა დაიკითხება. აღნიშნული გადაწყვეტილებით სააპელაციო სასამართლოს მოსამართლეთა პალატამ დაცვის მხარის შუამდგომლობა დააკმაყოფილა.

შაქარაშვილის მკვლელობაში მსჯავრდებულების ადვოკატების განცხადებით, მერებაშვილმა და შერმადინმა შაქარაშვილის მიმართ განხორციელებულ ძალადობაში მონაწილეობა აღიარეს.

სწორედ აღნიშნული ჩვენებიდან და საქმეში არსებული ახალი გარემოებიდან გამომდინარე, გიორგი შაქარაშვილის მკვლელობაში მსჯავრდებული პირების ადვოკატებმა პენიტენციურ დაწესებულებაში გამოკითხეს გიორგი მერებაშვილი და ლაშა შერმადინი, რის შემდეგაც თბილისის სააპელაციო სასამართლოში მათი მოწმის სახით დაკითხვის შუამდგომლობა დააყენეს.

აღნიშნულ საკითხთან დაკავშირებით, სასამართლო სათათბიროდ იყო გასული, გადაწყვეტილება კი დღეს გამოცხადდა.

ცნობისთვის, ფეხბურთელ გიორგი შაქარაშვილის განზრახ ჯგუფურად მკვლელობაზე მსჯავრდებულები არიან - არჩილ გაგნიძე, ნიკოლოზ რევაზიშვილი, ვახტანგ ჩიქოვანი, ზ.ხ., და ა.ქ,.