ზუგდიდში ქალთა სიცოცხლის უფლების დასაცავად მდუმარე აქცია-პერფორმანსი გაიმართა.

აქციის მონაწილეებმა 21 მაისს, თბილისში, საზოგადოებრივ ტრანსპორტში მეუღლის მიერ ახალგაზრდა ქალის მკვლელობის ფაქტი გააპროტესტეს.

"21 მაისს, ადამიანმა საკუთარი შვილების, დის და დისშვილების თვალწინ საზოგადოებრივ ტრანსპორტში ქალს ყელი გამოჭრა. არ ვიცი, როგორ შეიძლება ამის შეფასება. ჩვენ დღეს გამოვედით, რომ გავაპროტესტოთ კიდევ ერთხელ ფემიციდის ეს შემთხვევა. ეს არ არის პირველი შემთხვევა, არც საქართველოში და არც მსოფლიოში. გამოვდივართ ქალის სიცოცხლის ხელშეუხებლობის მხარდასაჭერად”, - განაცხადა ქალთა ასოციაცია "გვირილას" დამფუძნებელმა ეთო ალმასიამ.

31 წლის სოფო კვარაცხელიას, რომელიც შვილებთან ერთად იმყოფებოდა ქმარმა სასიკვდილო ჭრილობები ყელის არეში მიაყენა. შემთხვევა, 21 მაისს თბილისში, საზოგადოებრივ ტრანსპორტში მოხდა.