გორის მუნიციპალიტეტის მერი ვლადიმერ ხინჩეგაშვილი ხელოვნების სახლში გამართული პროექტის Art House 2022 - ის პრეზენტაციას დაესწრო. ამის შესახებ ინფორმაციას გორის მინიციპალიტეტის მერია ავრცელებს.

როგორც მათ მიერ გავრცელებულ განცხადებაშია აღნიშნული, ხელოვნების სახლის წარმომადგენელმა ოთო გვრიტიშვილმა საზოგადოებას გააცნო პროექტი, რომელიც გორის მერიის თანადაფინანსებით ხორციელდება.

ამასთან, პროექტი ითვალისწინებს წლის განმავლობაში ხელოვნების სახლში, კონკურსის წესით შერჩეული მსურველების გამოფენებს, კულტურული მემკვიდრეობის ობიექტების ძეგლებისა და ისტორიული ადგილების ამსახველი, ილუსტრირებული კატალოგების დაბეჭდვას, ასევე შეიქმნება ქუჩის საინტერესო სთრით - ართები. პროექტი „Art House 2022“ ასევე ითვალისწინებს ვებგვერდის შექმნას, სადაც განთავსდება ინფორმაცია გორის მუნიციპალიტეტში არსებული ისტორიული ადგილებისა და კულტურული მემკვიდრეობის ძეგლების შესახებ. პროექტი ახალგაზრდებისთვის ფოტოგრაფიის შემსწავლელ კურსსაც ითვალისწინებს.

გორის მერიის ინფორმაციით, პროექტის ფარგლებში „Art House“ - მა გამოფენების მოწყობის მიზნით, კონკურსი უკვე გამოაცხადა.

„ “Art House 2022“ - ის მიზანია, მუნიციპალიტეტის ტურისტული პოტენციალის პოპულარიზაცია და ადგილობრივი მოსახლეობისთვის და ვიზიტორებისთვის საინტერესო, კულტურულ - საგანმანათლებლო ღონისძიებების მოწყობა”,- აღნიშნულია გორის მერიის მიერ გავრცელებულ ინფორმაციაში.