ყველამ იცის, რომ 2012 წლის შემდეგ საქართველოში სიღარიბის მაჩვენებელმა დაიწყო კლება და ის რადიკალურად არის შემცირებული, - ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა.

როგორც პაპუაშვილმა აღნიშნა, 2012 წლამდე სიღარიბის მაჩვენებლის მატება იყო.

პარლამენტის თავმჯდომარის განცხადებით, 2020 წელს სიღარიბის მაჩვენებელი 19.5%-მდე იყო, ხოლო „ნაციონალური მოძრაობის“ მმართველობის დაახლოებით 30%-ს შეადგენდა.

ამასთან, პაპუაშვილმა მთავრობის პროგრამის შესრულების ანგარიშზე გაამახვილა ყურადღება.

„როდესაც ვსაუბრობთ მთავრობის პროგრამის შესრულების ანგარიშზე, ის ეხება იმ მიზნებს, რომელიც ჰქონდა დასახული მთავრობას თავის პროგრამაში - თუ რამდენად არის მიღწეული და ამ მიზნების მიღწევის რა ეტაპზე ვიმყოფებით. თავისთავად, პირველ რიგში საუბარია იმაზე, თუ რა შედეგები გვაქვს. ამასთან დაკავშირებით იქნება მოსმენა და ოპოზიციას ექნება შესაძლებლობა კრიტიკული მოსაზრებები დააფიქსიროს“ , - განაცხადა შალვა პაპუაშვილმა.