გორში, ბავშვთა დაცვის საერთაშორისო დღე სხვადასხვა სახის გასართობი ღონისძიებით აღინიშნა. ამის შესახებ ინფორმაციას­ გორის მუნიციპალიტეტის მერია ავრცელებს.

მათი ცნობით, თეატრის სკვერში, სააღმზრდელო დაწესებულებებისა და სკოლების მიერ მოწყობილი საგამოფენო სივრცეები გორის მუნიციპალიტეტის მერთან, ვლადიმერ ხინჩეგაშვილთან ერთად, შიდა ქართლის სახელმწიფო რწმუნებულის მოადგილემ აბელ აბესაძემ და გორის მუნიციპალიტეტის საკრებულოს თავმჯდომარემ დავით რაზმაძემ დაათვალიერეს.

გორის მერიის ინფორმაციით, აღნიშნულ სკვერში, დილიდან პატარებს და არა მარტო პატარებს, შესაძლებლობა ჰქონდათ მოესმინათ ადგილობრივი შემსრულებლებისთვის, დაეთვალიერებინათ წარმოდგენილი ნამუშევრები, დასწრებოდნენ ანიმატორების წარმოდგენებს, მოეხატათ სახე და სპეციალურად მოწყობილ სივრცეებში გადაეღოთ ფოტოები.

ამასთან, ბავშვთა საერთაშორისო დღესთან დაკავშირებით, ღია კარის დღე იყო გამოცხადებული ისტორიულ-ეთნოგრაფიულ მუზეუმსა და საბრძოლო დიდების მუზეუმში. გარდა ამისა, საბრძლო დიდების მუზეუმი მასპინძლობდა მოსწავლეთა ნახატების გამოფენასაც.

ღონისძიებები გაიმართა გორის მუნიციპალიტეტის კულტურისა და ტურიზმის განვითარების ხელშეწყობის სააგენტოს ორგანიზებით.