მარნეულს, აბდულა შაიგის სახელობის სახელმწიფო თოჯინების თეატრი, თბილისის საბავშვო და ახალგაზრდული თეატრების საერთაშორისო ფესტივალის ფარგლებში ესტუმრა. ამის შესახებ ინფორმაციას მარნეულის მერია ავრცელებს.

მათივე ინფორმაციით, მარნეულის მერის კენან ომაროვის ინიციატივით და მხარდაჭერით, მარნეულის კულტურის ცენტრში, აბდულა შაიგის სახელობის სახელმწიფო თოჯინების თეატრი წარდგა მაყურებელთა წინაშე და ითამაშა სპექტაკლი „მუსიე ჟორდანი და დერვიშ მასტალი შაჰი".

„ჩემთვის განსაკუთრებით მნიშვნელოვანია მსგავსი აქტივობები ჩვენს მუნიციპალიტეტში, რათა მარნეულელ ახალგაზრდებს ადგილზე ჰქონდეთ კულტურული და შემეცნებითი ღონისძიებებზე მეტი წვდომის შესაძლებლობა", - განაცხადა მარნეულის მერმა კენან ომაროვმა.

აღსანიშნავია, რომ აზერბაიჯანის აბდულა შაიგის სახელობის სახელმწიფო თოჯინების თეატრი საქართველოში თბილისის საბავშვო და ახალგაზრდული თეატრების ფესტივალის „თაობა" ფარგლებში იმყოფება. მარნეულს 4 ივნისს, აღნიშნული ფესტივალის ფარგლებში, ფოთის ვალერიან გუნიას სახელობის პროფესიული სახელმწიფო თეატრი სპექტაკლით „ფიროსმანი" ეწვევა.