რაჭა-ლეჩხუმ სვანეთის მაჟორიტარი დეპუტატის, გოჩა ენუქიძის ინფორმაციით, ქვემო სვანეთში, ლენტეხის სოფელ ფაყში და სკალდის მთაზე, სახალხო რელიგიური დღესასწაული ფაყობა-სკალდობა აღინიშნა. ინფორმაციას გუბერნატორის ადმინისტრაცია ავრცელებს.
დღესასწაული აღდგომის ყოველ მეშვიდე კვირას იმართება და სულთმოფენობის ქრისტიანულ დღესასწაულს ემთხვევა.
როგორც გავრცელებულ ინფორმაციაშია აღნიშნული, სკალდის უზარმაზარი მთის წვერზე არსებული მთავარანგელოზის სახელობის ეკლესია შუა საუკუნეებშია აგებული და მისი კედლები უძველეს ხატს იცავს, რომელზეც მთავარანგელოზები მიქაელი და გაბრიელი არიან გამოსახული, ხოლო მათ შორის – მაცხოვარი. მთავარანგელოზის სალოცავში სკალდობის დღესასწაულზე მხოლოდ მამაკაცები ლოცულობენ, ქალები კი სკალდის ძირში გაშენებულ სოფელ ფაყში არსებულ ღვთისმშობლის ტაძარში.
,,დღევანდელი დღე, ლენტეხში სხვადასხვა აქტივობებით აღინიშნა, რომელსაც საქართველოს რაგბის კავშირის პრეზიდენტთან, სოსო ტყემალაძესთან, ადგილობრივი და რეგიონული ხელისუფლების წარმომადგენლებთან ერთად დავესწარი.გილოცავთ სკალდობისა და სულთმოფენობის დღესასწაულებს. სკალდის მთავარანგელოზი გფარავდეთ თქვენ, თქვენს ოჯახებს და სრულიად საქართველოს", - აცხადებს გოჩა ენუქიძე