„ლელოს“ პოლიტიკური მდივნის, სალომე სამადაშვილის განცხადებით, 20 ივნისს დაგეგმილი ევროპული კურსის მხარდამჭერი აქცია პოლიტიკური არაა და პრეზიდენტს შეუძლია შეკრებას შეუერთდეს.
ამასთან, როგორც სამადაშვილმა ჟურნალისტებს განუცხადა, მნიშვნელოვანია, თუ პრეზიდენტი საკუთარ საკონსტიტუციო პრეროგატივას გამოიყენებს, რათა არსებულ ვითარებაში პოზიტიური ცვლილება შეიტანოს.
“მნიშვნელოვანია, მაშინ, როდესაც ანტიდასავლური რიტორიკა, მათ შორის „ქართული ოცნების“ მხრიდან აპელირებს იმაზე, რომ ევროპული კურსის მხარდამჭერი მიტინგები მრავალრიცხოვანი არაა, მნიშვნელოვანია, რაც შეიძლება მეტმა ადამიანმა მიიღოს მონაწილეობა. რაც შეეხება პრეზიდენტ ზურაბიშვილს, მას აქვს შესაძლებლობა, შემოუერთდეს 20 ივნისის აქციას. ეს არ არის პოლიტიკური აქცია. ესაა აქცია ევროპული მომავლის მხარდასაჭერად და თუ ის შეძლებს და გამოიყენებს საკუთარ საკონსტიტუციო პრეროგატივას, რათა ამ ვითარებაში რამე პოზიტიური ცვლილება შეიტანოს, ეს იქნება ძალიან მნიშვნელოვანი“, - განაცხადა სალომე სამადაშვილმა.