პარტია „ქართული ოცნება - დემოკრატიული საქართველოს“ თავმჯდომარის, ირაკლი კობახიძის განცხადებით, ოპოზიცია დღემდე უხეშად არღვევს პოლარიზაციის შესახებ ევროკომისიის მოწოდებას. მან პარლამენტის პლენარულ სხდომაზე ოპოზიციის წევრებს მიმართა, ლექსიკონიდან ამოიღონ სიტყვები, როგორიცაა მაგალითად, პრორუსული ხელისუფლება, პუტინისტური ხელისუფლება, გადატრიალება და რიგგარეშე არჩევნები.

„ევროკომისიის დოკუმენტში პირველ პუნქტად წერია, რომ საქართველოში უნდა შემცირდეს პოლარიზაცია, თუმცა, ყველა ვხედავთ, რა ვითარებაა საქართველოში. ოპოზიცია ამ დოკუმენტის გამოქვეყნებიდან პირველივე წუთებში არღვევდა ამ პუნქტს და დღემდე უხეშად არღვევს პოლარიზაციის შესახებ ევროკომისიის მოწოდებას. ნახეთ რიტორიკა გასული 4 დღის განმავლობაში. შესაბამისად, ერთადერთი პუნქტის შესრულება ევალება ოპოზიციას და ხედავთ, რომ იმასაც არ ასრულებს. ეს არის მათი დამოკიდებულება ევროპისადმი, მათი დამოკიდებულება ღირებულებისადმი. აქედან ჩანს ძალიან კარგად, რომ სინამდვილეში, მათ ევროპა საერთოდ არ უნდათ, საპირისპირო გზა აქვთ, წინააღმდეგ შემთხვევაში, დეპოლარიზაციის მიმართულებით ერთ ნაბიჯს მაინც გადადგამდნენ. იმისთვის, რომ ქვეყანაში პოლარიზაცია შემცირდეს, საჭიროა მინიმუმ ლექსიკონიდან ამოიღოთ ისეთი სიტყვები, როგორიცაა მაგალითად, პრორუსული ხელისუფლება, პუტინისტური ხელისუფლება. ლექსიკონიდან ამოიღოთ გადატრიალება, რიგგარეშე არჩევნები და ა.შ., თუმცა კი არ ახერხებთ, არამედ ვერ ახერხებთ, გამომდინარე იქიდან, რომ თქვენი გზა არის არა ევროპული, არამედ მთლიანად სხვა მიმართულებით“, - განაცხადა კობახიძემ.

გარდა ამისა, მისი შეფასებით, გუშინ გამართული აქცია „შინ ევროპისკენ“ „ნაციონალური მოძრაობისა“ და „სირცხვილიას“ მიერ იყო ორგანიზებული.

„ეს იყო „ნაციონალური მოძრაობის“ და „სირცხვილიას“, მისი ახალგაზრდული ფრთის მიერ ორგანიზებული და ეს იყო ბაკურიანის გეგმის შემადგენელი ნაწილი. ეს გეგმა დაისახა ბაკურიანში და მისი აღსრულება დაიწყეს, თუმცა ეს გეგმა წარუმატებლობისთვის არის განწირული. ბაკურიანის შეკრების მონაწილეებს ძალიან მარტივი გათვლა ჰქონდათ, მათ რატომღაც ჰქონდათ მოლოდინი, რომ აუცილებლად ყველა ქვეყანას მიენიჭებოდა კანდიდატის სტატუსი და საქართველოს არა, ეს საიდანღაც წინასწარ იცოდნენ. ამას უნდა მოჰყოლოდა შემდეგ აქციები, არეულობა და ამ გეგმის ბოლო წერტილი არის ომი. ეს გეგმა ძალაშია, თუმცა, ბუნებრივია, ჩვენ არავის მივცემთ ამ გეგმის აღსრულების საშუალებას“, - განაცხადა კობახიძემ.