გამწარებულ ხალხს, უფლებააყრილ მოქალაქეებს არ აქვთ არანაირი განრიგი, როდის და რანაირად მოიქცევიან - 100 ათასმა კაცმა თბილისში უთხრა ხელისუფლებას, რომ ასე აღარ გამოვა, - ამის შესახებ „ერთიანი ნაციონალური მოძრაობის“ წევრმა, ნუგზარ წიკლაურმა „პალიტრანიუსის“ გადაცემა „რეზიუმეში“ განაცხადა.

ოპოზიციონერმა პოლიტიკოსმა გუშინ გამართულ აქციაზე ისაუბრა და განაცხადა, რომ გუშინ ქართველმა ხალხმა „თავი შეანჯღრია“ და უთხრა თავს, რომ ახლა არის მომენტი.

„ქართულმა საზოგადოებამ შეანჯღრია საკუთარი თავი, ქართულმა საზოგადოებამ უთხრა თავის თავს, რომ ახლა არის მომენტი, როდესაც ის უნდა გამოვიდეს, თუ არ უნდა ქვეყნის უკუსვლა იყოს შეუქცევადი პროცესი.

მთავარი ის კი არ არის, ვინ მოიგებს ან წააგებს [არჩევნებს], მთავარია, რომ ქართველი ხალხის ნება იყოს გამოხატული ნებისმიერ არჩევნებში. მთავარია, რომ ტერორის ქვეშ არ ტარდებოდეს ეს არჩევნები, მოსყიდვით და ადამიანების დამცირებით. ამიტომ არის საჭირო, რომ ევროპელების დიდი ჩართულობა იყოს აქ, მიუკერძოებელი ადამიანები იყვნენ ამ საარჩევნო ურნებთან. არა ისეთი ადამიანები, ვისაც წინასწარ აქვთ განზრახული, რომ გადაწერონ ნებისმიერი შედეგი, რასაც მათ ეტყვის მმართველი გუნდი. ამის გარეშე ამ ქვეყანაში იქნება ნამდვილი პოლიტიკური ქარიშხალი. როგორც მიწისძვრას და ქარიშხალს არ აქვს განრიგი და არ შეუძლია იწინასწარმეტყველოს, 4 თვის შემდეგ რა იქნება, ასე გამწარებულ ხალხს, უფლება აყრილ მოქალაქეებს არ აქვთ არანაირი განრიგი, როდის და რანაირად მოიქცევა.

გამოვიდა ეს ხალხი მშვიდობიანად, წყნარად, ევროპულად. 100 ათასმა კაცმა თბილისში უთხრა ხელისუფლებას, რომ ასე აღარ გამოვა მომავალი, თუ ევროპას გვაკარგვინებს და ჩვენი შვილების მომავალს წირავს“, - განაცხადა ნუგზარ წიკლაურმა.