სენაკში სტიქიის ზონაში გაწმენდითი სამუშაოები ხორციელდება
უხვმა ნალექმა და წყალმოვარდნებმა სამეგრელოს მუნიციპალიტეტებში პრობლემები შექმნა.
სამეგრელო-ზემო სვანეთის სამხარეო ადმინისტრაციის ცნობით, ძლიერი წვიმებისგან წარმოქმნილმა წყალდიდობამ განსაკუთრებით სენაკის მუნიციპალიტეტი დაზარალდა.
მათივე ინფორმაციით, წყალმოვარდნების შედეგად რამდენიმე ქუჩა დაიტბორა, წყალმა საცხოვრებელი სახლების პირველ სართულებზეც შეაღწია. რამდენიმე ოჯახის უსაფრთხო ადგილას გადაყვანა საჭირო გახდა.
უხვმა ნალექმა სენაკის მუნიციპალიტეტში ხიდები და შიდა გზებიც დააზიანა. ადგილზე მუნიციპალური და სამაშველო სამსახურები მუშაობენ.
„სტიქიის ზონაში სამეგრელო-ზემო სვანეთის სახელმწიფო რწმუნებული გიორგი გუგუჩია იმყოფება.
სენაკის კეთილმოწყობის სამსახური გაწმენდით სამუშაოებს ახორციელებს. ზარალის დამთვლელი კომისია სენაკში მუშაობას დილიდან დაიწყებს.
ძლიერმა წვიმებმა სენაკთან ერთად, პრობლემები ზუგდიდის, ფოთის, ჩხოროწყუს, წალენჯიხის, მარტვილისა და აბაშის მუნიციპალიტეტებში შექმნა,“ - აღნიშნულია გავრცელებულ ინფორმაციაში.
