არ ვიცი შეთანხმებული თამაშია თუ მართლა არსებობს შიდა გაუგებრობები, მაგრამ რასაც ვუყურებთ, პრეზიდენტი ცდილობს პოზიციონირდეს როგორც პროევროპელი,ხოლო ბატონი ღარიბაშვილი ცდილობს პოზიციონირდეს როგორც ევროპასთან მებრძოლი, - ასე აფასებს "გირჩის" დეპუტატი იაგო ხვიჩია პარლამენტში პრემიერ- მინისტრის გუშინდელ მოსმენას და მასზე სალომე ზურაბიშვილის გამოხმაურებას.

"მე არ ვიცი, "ქართული ოცნების" შეთანხმებული თამაშია როცა პრეზიდენტი ერთს ლაპარაკობს, პრემიერი - მეორეს, პარლამენტის თავმჯდომარე-მესამეს და მეოთხეს კიდევ ვიღაც, თუ მართლა არსებობს მათ შორის შიდა გაუგებრობები და უთანხმოება და ახლა ასეთი ფორმით იჩინა თავი, მაგრამ რასაც ვუყურებთ, პრეზიდენტი ცდილობს პოზიციონირდეს როგორც პროევროპელი,ხოლო ბატონი ღარიბაშვილი ცდილობს პოზიციონირდეს როგორც ევროპასთან მებრძოლი, რას ემსახურება ეს, წარმოდგენა არ მაქვს, მაგრამ სიუჟეტი ასეთია, რასაც ვხედავ,"- განაცხადა ხვიჩიამ.

ის ასევე გამოეხმაურა მოსმენების კანონთან დაკავშირებით პრეზიდენტის ვეტოს და ეს დადებითად შეაფასა, რადგან ეს კანონი ადამიანის უფლებებს ამცირებს. ამასთან, მისივე განცხადებით, კანონების 90% მეათე მოწვევის პარლამენტში ასეთია და კარგი იქნება თუ სალომე ზურაბიშვილი მსგავს კანონებს ვეტოს დაადებს.