ოპოზიციის ნაწილი ხელისუფლებას მოუწოდებს, სათათბირო, რომელმაც ბათუმის ავარიულ სახლებთან დაკავშირებით კანონპროექტში ცვლილებები უნდა განიხილოს, ოპოზიციის მიერ წარდგენილი არასამთავრობო ორგანიზაციებით დაკომპლექტდეს. აღნიშნულის შესახებ პარლამენტში "ნაციონალური მოძრაობის" დეპუტატმა დავით ხაჯიშვილმა და პარლამენტის უფრაქციო წევრმა არმაზ ახვლედიანმა პარლამენტში ბრიფინგი გამართეს.
როგორც დეპუტატებმა ბრიფინგზე განმარტეს, მათი მოთხოვნაა ასევე, რომ ძველ ბათუმში k2 კოეფიციენტი არ გაიზარდოს.
"იმ ნაწილში, რომ ერთპიროვნულად არ უნდა იქნეს გადაწყვეტილი მერის მიერ ვის უნდა მიენიჭოს k2- ის სტატუსი, ამასთან დაკავშირებით შემოიტანეს სათათბიროს ნაწილი, მაგრამ ვხედავთ, რომ ეს არის ფასადური, რადგან მერს შეუძლია სათათბირო თავის მეგობრებით დააკომპლექტოს, ამიტომ ჩვენი რჩევა იქნება, სათათბიროს წევრები იყვნენ ოპოზიციის მიერ წარდგენილი არასამთავროვო ორგანიზაციები. სურვილი გვაქვს, რომ k 2- ის გაზრდასა და ავარიული სახლის სტატუსის მინიჭებაზე საბოლოო გადაწყვეტილება აუცილებლად უნდა მიიღოს ხალხის მიერ არჩეულმა საკრებულომ", - განაცხადა ხაჯიშვილმა.
ამასთან, არმაზ ახვლედიანის განცხადებით, ბათუმის მოსახლეობა კანონში არსებული სახით ცვლილებების შეტანას მხარს არ უჭერს. გარდა ამისა, ახვლედიანი კორუფციულ რისკებზეც საუბრობს.
"ხელისუფლება გარკვეულ დათმობებზე მოდის, მაგრამ გულწრფელად უნდა გითხრათ, რომ იმ პირობებში როცა მოქალაქეს არ აქვს უფლება გაასაჩივროს სასამართლოში და იმედი ჰქონდეს სამართლიანი სასამართლოსი, როცა არ აქვს ხმა ბათუმის საკრებულოში, საკრებულო არის ფიქტიური ორგანო, მერი კი კორუფციულ გარიგებებშია, რთულად წარმომიდგენია, ბათუმელთა ინტერესები იყოს გათვალისწინებული და ბათუმი გადაურჩეს „ოცნებისეულ“ ჩაბეტონების მორიგ შემზარავ ტალღას,"- განაცხადა ახვლედიანმა.
