დღეს, ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 70 სტუდენტი გერმანიაში გაემგზავრა.

აჭარის ავტონომიური რესპუბლიკის მთავრობის ინფორმაციით, სტუდენტები 3 თვის განმავლობაში ტურიზმის სფეროში სასწავლო პრაქტიკას გაივლიან.

აჭარის მთავრობის თავმჯდომარე თორნიკე რიჟვაძე პროგრამაში მონაწილე სტუდენტებს შეხვდა და პროგრამის მნიშვნელობასა და სამომავლო გეგმებზე ესაუბრა.

,,მოხარული ვარ, რომ ახალგაზრდები თეორიულ ცოდნასთან ერთად, გაიუმჯობესებენ პრაქტიკულ უნარ-ჩვევებს საზღვარგარეთ, რაც მათ მომავალში წარმატებით დასაქმების საშუალებას მისცემს. დღეს, როგორც მთავრობის, ისე ყველა მოქალაქის მთავარი ამოცანაა გავხდეთ ევროპის სრულფასოვანი წევრი. დარწმუნებული ვარ, რომ ამ გზას ჩვენ ახალგაზრდებთან ერთად აუცილებლად წარმატებით გავივლით”, - განაცხადა მთავრობის თავმჯდომარემ სტუდენტებთან შეხვედრისას.

ცნობისთვის, საერთაშორისო პრაქტიკა გერმანიის შვერინის ბალტიკის კოლეჯსა და ბათუმის შოთა რუსთაველის სახელმწიფო უნივერსიტეტს შორის გაფორმებული მემორანდუმისა და აჭარის ავტონომიური რესპუბლიკის მთავრობის პროგრამული დაფინანსების საფუძველზე ხორციელდება. 2013 წლიდან საწარმოო პრაქტიკა გერმანიაში ბსუ-ს 700 -ზე მეტმა სტუდენტმა გაიარა.

აჭარის მთავრობის ხელშეწყობით, 2022 წელს, ბათუმის საზღვაო აკადემიის 10 სტუდენტი სწავლას ფლენსბურგის უნივერსიტეტში გააგრძელებს.

აჭარის მთავრობის მხარდაჭერით, სტუდენტთა დახმარების და სტუდენტთა საზღვარგარეთ სწავლის პროგრამებით 2018-2022 წლებში სწავლა დაუფინანსდა 5000-ზე მეტ სტუდენტს.