ევროკავშირის მხარდაჭერით, ძლიერი სამოქალაქო საზოგადოების ჩამოყალიბებისა და ფორმირების მიზნით, ორგანიზაცია CENN-მა, პარტნიორ ორგანიზაციებთან ერთად სამოქალაქო საზოგადოების განვითარების პროექტი, თვითმმართველობებთან მემორანდუმის საფუძველზე დაიწყო. ამის შესახებ ინფორმაციას გარდაბნის მუნიციპალიტეტის მერია ავრცელებს.
მათივე ცნობით, ურთიერთთანამშრომლობის მემორანდუმს, ხელი გარდაბნის მუნიციპალიტეტის მერმა დავით კარგარეთელმა მოაწერა.
„პროექტი 4 წლის განმავლობაში ქვემო ქართლის (მარნეული, თეთრიწყარო, დმანისი, გარდაბანი, ბოლნისი, წალკა) და სამცხე-ჯავახეთის (ახალციხე, ნინოწმინდა) რეგიონების რვა მუნიციპალიტეტში იმუშავებს და უზრუნველყოფს სამოქალაქო საზოგადოების ორგანიზაციებისა და ადგილობრივი თვითმმართველობის ორგანოების ჩართულობას სამოქალაქო საზოგადოების მონაწილეობის ხარისხის გასაუმჯობესებლად და მათი შესაძლებლობების განსავითარებლად,“-აღნიშნულია გავრცელებულ ინფორმაციაში.
გარდაბნის მუნიციპალიტეტის მერიის ცნობით, შეხვედრაზე დამსწრე საზოგადოებას სიტყვით მიმართეს ქვემო ქართლში სახელმწიფო რწმუნებულმა გიორგი დოხტურიშვლმა, პარტნიორი და დონორი ორგანიზაციების წარმომადგენლებმა.
