ზუგდიდის მუნიციპალიტეტის სოფელ ახალაბასთუმანში, ყოფილი სკოლა- ინტერნატის შენობაში, სადაც იძულებით გადაადგილებული პირები ცხოვრობენ, ჭერი ჩამოინგრა, რის შედეგადაც, ერთი პირი დაშავდა.

დაშავებული მამაკაცი ზუგდიდის რეფერალურ ჰოსპიტალშია გადაყვანილი. მას შესაბამისი სამედიცინო დახმარება უტარდება.

„წუხელ კედელი ცვიოდა, გვეშინოდა, მაგრამ მაინც გავჩერდით. 14 მაისს მე დავშავდი, სასწრაფოთი წამიყვანეს. 7-8 წელია აქ ვცხოვრობთ. რამდენჯერმე მივმართე, ყველამ მომატყუა. ქირით რატომ არ ცხოვრობო. 8 ქულა მოგვივიდა, სიაში ვიყავით, მაგრამ სხვას მისცეს ჩემს მაგივრად. სად უნდა წავსულიყავით არსად არ მომცეს თავშესაფარი",- განაცხადა დაშავებულის მეუღლემ.

როგორც "ინტერპრესნიუსს" მერის წარმომადგენელმა ახალაბასთუმანში ხუტა თოდუამ განუცხადა, აღნიშნული შენობა დალუქული იყო. მისივე ინფორმაციით, აქ ოთხი ოჯახი ცხოვრობს, რომლებიც თვითნებურად არიან შესახლებული.

რაც შეეხება დაშავებულს, თოდუა ამბობს, რომ მის ოჯახს ფულადი დახმარება უკვე მიღებული აქვს.