ხმაური და დაპირისპირება იყო ოზურგეთის მუნიციპალიტეტის საკრებულოს სხდომაზე. საკრებულოს დარბაზში ისმოდა შეძახილები: „სააკაშვილის მონები“, „ქართული ოცნების" ზონდერები, „ომის პარტია", „ბორინკა ივანიშვილის დავალების შემსრულებლები".
სხდომა ურთიერთბრალდებების ფონზე მიმდინარეობდა. ხმაური ფრაქცია ,,ნაციონალური მოძრაობის“ თავმჯდომარის დავით მჟავანაძის განცხადებას მოჰყვა. მისი თქმით, „ნაციონალური მოძრაობის“ ლიდერები ოზურგეთში, ეკლესიის ეზოში მოსახლეობასთან ევროინტეგრაციის თემაზე შეხვედრას მართავდნენ, რა დროსაც მისივე განცხადებით, მათთან,, ქართული ოცნების“ წევრები მივიდნენ და შეხვედრის ჩაშლა სცადეს. მჟავანაძის განცხადების შემდეგ „ნაციონალური მოძრაობის“ წევრებმა სხდომა პროტესტის ნიშნად დატოვეს.
შეგახსენებთ, აქციის „შინ ევროპისკენ“ წინა დღეებში ოზურგეთში გამართული პროევროპული საინფორმაციო კამპანიის დროს სიტყვიერი და ფიზიკური დაპირისპირება რამდენჯერმე მოხდა. ოპოზიციონერი ლიდერების განცხადებით, მოქალაქეებთან შეხვედრებში ხელს საჯარო მოხელეები და „ქართული ოცნების“ მხარდამჭერები უშლიდნენ.