ირაკლი კობახიძემ ულტიმატუმი წაუყენა ევროკავშირს - თუ ევროკავშირი საქართველოს კანდიდატის სტატუსს მისცემს, ამ შემთხვევაში, ისინი კეთილ ნებას გამოიჩენენ და საარჩევნო ბარიერს 2 პროცენტამდე დაწევენ, - ასე ეხმაურება „ქართული ოცნების" თავმჯდომარის განცხადებას ფრაქცია „ნაციონალური მოძრაობის" წევრი ლევან ბეჟაშვილი.

მისივე თქმით, ეს არის აბსურდი, რადგან ქვეყანა იმ მდგომარეობაში არ არის, რომ ევროკავშირს დამატებითი მოთხოვნები წაუყენოს.

„ასეთი რიტორიკით და განცხადებებით კიდევ უფრო აშორებენ საქართველოსთან მიმართებაში ევროკავშირის გადაწყვეტილებას და ხელს უწყობენ ქვეყანაში რუსული ნარატივის გაგრძელებას. აჩვენებენ, რომ მათთვის მთავარი კანდიდატის სტატუსის მიღება კი არ არის, არამედ რაც შეიძლება გამწვავდეს ურთიერთობა საქართველოსა და ევროკავშირს შორის. ისევ ულტიმატუმის ენით აპირებენ ევროკავშირთან საუბარს“, - განაცხადა ლევან ბეჟაშვილმა.

„ქართული ოცნება“ მზადაა 2%-მდე დაწიოს საარჩევნო ბარიერი, თუ საქართველო დეკემბერში ევროკავშირის კანდიდატის კანდიდატის სტატუსს მიიღებს.

„დეკემბერში, ევროკავშირის მიერ საქართველოსთვის კანდიდატის სტატუსის მინიჭებიდან არაუგვიანეს 1 თვისა, საქართველოს პარლამენტი სამივე მოსმენით მიიღებს კონსტიტუციურ კანონს, რომლის თანახმად 2024 წლის და მისი მომდევნო საპარლამენტო არჩევნები სრულად პროპორციული სისტემით და 2%-იანი საარჩევნო ბარიერით ჩატარდება“, - განაცხადა ირაკლი კობახიძემ.