„ქართულმა ოცნებამ“ ბათუმი უკანონო დაშენება-მიშენების ქალაქად აქცია, - ეს განცხადება ბათუმის საკრებულოში „ერთიანი ნაციონალური მოძრაობის“ წევრმა რაზო ხარაზმა ბრიფინგზე გააკეთა.

მისი თქმით, ახალ ბულვარში მაღალსართულიან კორპუსზე უკანონო დაშენება მიმდინარეობს, რაზეც ბათუმის მერიის ზედამხედველობის სამსახურს რეაგირება არ აქვს.

რეზო ხარაზის თქმით, ბათუმში უკანონო მშენებლობებს თავად ბათუმის მერი არჩილ ჩიქოვანი უწყობს ხელს.

“ახალი ბულვარის მიმდებარე ტერიტორიაზე კომპანია “ვიევ ბათუმის” საცხოვრებელ კორპუსზე უკანონო დაშენება მიმდინარეობს, ამ ყველაფერს თავად, ბათუმის მერი არჩილ ჩიქოვანი უწყობს ხელს, ალბათ, მისი ფინანსური დაინტერესება არის.

ფაქტია, რომ ზედამხედველობის სამსახურის მხრიდან რეაგირება არ არის. აღნიშნულ სამსახურს საკრებულოს წინა სხდომაზე ბიუჯეტი გაეზარდა და დამატებით შტატებიც გაეზარდა, ამ ფონზე ქალაქში უკანონობის აღკვეთას ვერ ვხედავთ.

აუდიტის დასკვნაც მიუთითებს, რომ უკანონობები ხდება ქალაქში. მოვუწოდებთ შესაბამის უწყებებს, ფაქტით დაინტერესდნენ“, - განაცხადა რეზო ხარაზმა.