დღეს კელი დეგნანმა ბიძინა ივანიშვილთან შეხვედრა დაადასტურა და თქვა, რომ საუბარი ქვეყნისთვის სტრატეგიულ საკითხებზე იყო - ძალიან გვაინტერესებს, რა არის ის სტრატეგიული ამოცანები, რაც ომსა და სანქციებს არ ეხებოდა, - ეს განცხადება პარლამენტში დეპუტატმა სოზარ სუბარმა გააკეთა, რომელმაც “ქართული ოცნების“ შემადგენლობიდან გასულ დეპუტატებთან ერთად საზოგადოებრივი მოძრაობის ჩამოყალიბების შესახებ გამოაცხადა.

როგორც სუბარმა ამ კონტექსტში განმარტა, 24 თებერვლიდან 21 მარტამდე ის პერიოდია, როცა ბიძინა ივანიშვილის მიმართ არაფორმალური სანქციები პიკში იყო.

მისივე თქმით, ამ დროს არ ხდებოდა ივანიშვილისთვის მის საკუთრებაში არსებული ნახატებისა და ვერტმფრენების გადაცემა და დაბლოკილი იყო საბანკო ანგარიში.

„რა შეიძლება იყოს სტრატეგიული საკითხები იმ პერიოდში, როდესაც ჩვენ მეზობელ ქვეყანაში არის ომი, როდესაც ოპოზიციის, არასამთავრობო ორგანიზაციების, უკრაინის ხელისუფლების წარმომადგენლების და ზოგიერთი ევროპელი პოლიტიკოსის მხრიდან იყო ღია მოწოდებები საქართველოს შესაძლებლობები გამოეყენებინა და ომში ჩართულიყო. ძალიან გვაინტერესებს რა არის ის სტრატეგიული ამოცანები, რაც ომსა და სანქციებს არ ეხებოდა. გვაინტერესებს ხომ არ იყო ზეწოლა, რომ ბიძინა ივანიშვილს საკუთარი გავლენა გამოეყენებინა ხელისუფლებაზე, რათა საქართველოს სანქციებს შეერთებოდა და ომის მიმართულებით რაღაც ნაბიჯები გადაედგა“, - განაცხადა სოზარ სუბარმა.