აჭარის უმაღლესი საბჭოს თავმჯდომარემ, დავით გაბაიძემ ბათუმის შოთა რუსთაველის სახელმწიფო უნივერსიტეტის კურსდამთავრებულებს უმაღლესი სასწავლებლის დამთავრება და ცხოვრების ახალ ეტაპზე გადასვლა მიულოცა.ინფორმაციას ამის შესახებ აჭარის უმაღლესი საბჭო ავრცელებს.

მათივე ცნობით, კურსდამთავრებულთა გამოშვების 85-ე საიუბილეო საზეიმო ღონისძიებაზე, მანტიებში გამოწყობილ ახალგაზრდებს წარმატებები აჭარის მთავრობის თავმჯდომარემ, თორნიკე რიჟვაძემ, ბსუ-ს რექტორმა, მერაბ ხალვაშმა და ხელისუფლების სხვა წარმომადგენლებმა უსურვეს.

„ბათუმის სახელმწიფო უნივერსიტეტი წელს ყველა საფეხურის საგანმანათლებლო პროგრამის 1650-მდე სტუდენტმა დაამთავრა. მათი გაცილების საზეიმო ღონისძიებაზე წარჩინებული სწავლისათვის, აქტიური სტუდენტური ცხოვრებისა და პანდემიასთან ბრძოლაში შეტანილი წვლილისათვის 190 სტუდენტს შესაბამისი სერტიფიკატი გადაეცა. ღონისძიების ფარგლებში, ექიმის ფიცი საზეიმოდ ჯანდაცვის მიმართულების კურსდამთავრებულებმა დადეს.

საზეიმო ცერემონია ქუდების ასროლით, ფოიერვერკითა და კონცერტით დასრულდა“, - აღნიშნულია ინფორმაციაში.