ჩოხატაურის მუნიციპალიტეტში, რუსთაველის ქუჩაზე მდებარე საცხოვრებელ კორპუსში ხანძარი გაჩნდა. არსებული ინფორმაციით, ცეცხლი ერთ-ერთი ბინიდან გავრცელდა.
ჩოხატაურის მერის დავით შარაშიძის თქმით, ხანძარი ლოკალიზებულია.
„ამ დროისათვის ხანძარი ლოკალიზებულია და მიმდინარეობს ცალკეული კერების ლიკვიდაცია. ადამიანები გამოყვანილი არიან ბინებიდან. საბედნიეროდ, მსხვერპლი არაა. არც სამედიცინო დახმარების გაწევა დასჭირდა ვინმეს. ადგილზე ამ დრომდე მობილიზებულია სამაშველო-სახანძრო და სასწრაფო სამედიცინო დახმარების ბრიგადები. ადგილზე იმყოფება ოთხი სახანძრო მანქანა", - განაცხადა დავით შარაშიძემ.
ხანძრის გამომწვევი მიზეზი, ჯერჯერობით დაუდგენელია.