ყვარლის მუნიციპალიტეტში, სოფელ შილდის ტყეში ხანძარსაწინააღმდეგო სამუშაოებში თავდაცვის სამინისტროს ძალები ჩაერთო.

როგორც ყვარლის მერმა განაცხადა, ხანძრის ზონაში აქტიურად მიმდინარეობს სამუშაოები და ამ ეტაპზე ცეცხლის გავრცელების საშიშროება არ არსებობს, თუმცა რთული რელიეფი და ძლიერი სიცხე ცეცხლის სრულ ლოკალიზებას აფერხებს.

გივი ზაუტაშვილის თქმით, ძლიერი დაკვამლიანებაა, რადგან ცეცხლი ტყის ქვედა საფარზე ფოთლებს უკიდია.

„ვითარება უცვლელია, გავრცელების საშიშროება არ არის. შეუჩერებლად მუშაობენ მეხანძრე-მაშველები, სატყეო სამსახური და ადგილობრივები. ახლა თავდაცვის სამინისტროს რამდენიმე დანაყოფიც ჩაერთო“, - აცხადებს გივი ზაუტაშვილი.

რა გახდა ხანძრის გამომწვევი მიზეზი და გახდება თუ არა ავიაციის ჩართვა საჭირო, ამ ეტაპზე უცნობია. შილდის ტყეში ხანძარი გუშინ გაჩნდა.