ევროკომისარი - ჩვენ არ გვეშინია პუტინის გადაწყვეტილებების - ევროკავშირი ელოდება, რომ რუსეთი პატივს სცემს ენერგეტიკულ კონტრაქტებს
ევროკავშირი ელოდება, რომ რუსეთი პატივს სცემს არსებულ ენერგეტიკულ კონტრაქტებს, მაგრამ თუ ის ამას არ გააკეთებს, მზად არის, გამოწვევას გაუმკლავდეს, - ამის შესახებ ევროკომისარმა ეკონომიკის საკითხებში, პაოლო ჯენტილონიმ განაცხადა.
გაზსადენ „ჩრდილოეთის ნაკადი 1“-ის შეჩერების შესახებ დასმული კითხვის საპასუხოდ ჯენტილონიმ ჟურნალისტებს განუცხადა: "ჩვენ არ გვეშინია პუტინის გადაწყვეტილებების. ჩვენ ვთხოვთ მათ, პატივი სცენ კონტრაქტებს, მაგრამ თუ ასე არ მოიქცევიან, ჩვენ მზად ვართ რეაგირებისთვის".
ევროკომისარმა ეკონომიკის საკითხებში ასევე თქვა, რომ რუსული ნავთობის ფასზე ლიმიტის დაწესებას, რაზეც „დიდი შვიდეულის“ ქვეყნების ფინანსთა მინისტრები გუშინ შეთანხმდნენ, შესაძლოა სხვა ქვეყნებიც შეუერთდნენ.
”განვიხილეთ, თუ როგორ უნდა შევქმნათ ფართო კოალიცია. დარწმუნებული ვარ, რომ ისეთი ქვეყნები, როგორიცაა ავსტრალია და სამხრეთ კორეა, შეიძლება დაინტერესდნენ ამ კოალიციაში გაწევრიანებით,” – აღნიშნა პაოლო ჯენტილონიმ.
შეგახსენებთ, რუსულმა კომპანია „გაზპრომმა“ გაზსადენ „ჩრდილოეთის ნაკადით“ ევროპას გაზის მიწოდება სრულად შეუწყვიტა, რის მიზეზადაც საკომპრესორო სადგურზე არსებული გაუმართაობა დაასახელა.
v-if="article.gallery" v-html="article.gallery"
