საქართველოს პარლამენტის იურიდიულ საკითხთა კომიტეტის სხდომაზე, კომიტეტის თავმჯდომარე ანრი ოხანაშვილი და საქართველოს პრეზიდენტის საპარლამენტო მდივანი გიორგი მსხილაძე ერთმანეთს სიტყვიერად დაუპირისპირდნენ.

დაპირისპირების მიზეზი კი გიორგი მსხილაძის განცხადება გახდა, რომ მან პრეზიდენტის მიერ მოსმენების კანონზე დადებული ვეტოს ირგვლივ დასმულ სამართლებრივ შეკითხვებზე უპასუხა და მეტ შეკითხვებს აღარ უპასუხებს.

კომიტეტის თავმჯდომარის, ანრი ოხანაშვილის განცხადებით, პრეზიდენტის საპარლამენტო მდივანმა როდესაც კომიტეტში მიდის, "ქცევის წესები უნდა იცოდეს".

„ბატონო გიორგი ახლა მე თქვენ მოგიწოდებთ, რომ მეტი პასუხისმგებლობით მოეკიდოთ თქვენს პოზიციას და როდესაც აქ მობრძანდებით სხვა დროს, მობრძანდეთ მოტივირებული შენიშვნებით და აქ შეკითხვების შემობრუნებას თავი დაანებეთ. იცოდეთ სად ხართ, რა მოგეთხოვებათ, რა გავალიათ თქვენ კონსტიტუციით და კეთილი ინებეთ და შეასრულეთ თქვენი კონსტიტუციური ვალდებულება და გასცემთ პასუხს იქამდე, სანამ იქნება დამაზუსტებელი შეკითხვები, თუ არ შეგიძლიათ, ბრძანეთ, რომ არ გაქვთ პასუხი. როდესაც მობრძანდებით კომიტეტში, ტრიბუნაზე, იცოდეთ თქვენი ქცევის ვალდებულებები“, - განაცხადა ანრი ოხანაშვილმა.