პროფესიულ პროგრამებზე სწავლის მსურველთა ტესტირება დაიწყო

მთელი ქვეყნის მასშტაბით პროფესიულ პროგრამებზე სწავლის მსურველთა ტესტირება დაიწყო. ამის შესახებ ინფორმაციას განათლებისა და მეცნიერების სამინისტრო ავრცელებს.

საქართველოს განათლებისა და მეცნიერების მინისტრის მოადგილე ვალერიან გობრონიძე, შეფასებისა და გამოცდების ეროვნული ცენტრის ხელმძღვანელ სოფო გორგოძესთან ერთად, საქართველოს ტექნიკურ უნივერსიტეტში განთავსებულ საგამოცდო ცენტრს ეწვია და ტესტირების პროცესს ადგილზე გაეცნო.

მინისტრის მოადგილემ აპლიკანტებს წარმატებები უსურვა და აღნიშნა, რომ საგამოცდო ცენტრებში ყველა პირობაა შექმნილი იმისთვის, რომ პროფესიულ პროგრამებზე სწავლის მსურველებმა კომფორტულ და მშვიდ გარემოში შეძლონ საკუთარი ცოდნისა და შესაძლებლობების მაქსიმალურად გამოვლენა.

„ვალერიან გობრონიძემ განსაკუთრებული ყურადღება გაამახვილა პროფესიულ ტესტირებაში ეთნიკური უმცირესობების წარმომადგენელთა ჩართულობაზე. მისი თქმით, მათ წელსაც აქვთ შესაძლებლობა, მშობლიურ ენაზე გაიარონ პროფესიული ტესტირება, რამაც მნიშვნელოვნად გაზარდა პროფესიულ განათლებაში ეთნიკური უმცირესობების წარმომადგენელთა მონაწილეობის მაჩვენებელი.

შეფასებისა და გამოცდების ეროვნულმა ცენტრმა პროფესიულ პროგრამებზე სწავლის მსურველი სპეციალური საგანმანათლებლო საჭიროების მქონე 150-მდე აპლიკანტისთვის, გამოსაცდელთა საჭიროებების გათვალისწინებით, უზრუნველყო საგამოცდო სივრცის მოწყობა და მათთვის ხელსაყრელი საგამოცდო გარემოს შექმნა.

პროფესიული ტესტირება 6 სექტემბერს, 09:00 საათზე საბუნებისმეტყველო საგნების გამოცდით დაიწყო და 8 სექტემბრის ჩათვლით გაგრძელდება. საქართველოს მასშტაბით ჯამში 53 საგამოცდო ცენტრია გახსნილი, აქედან 4 თბილისში ფუნქციონირებს.

7 სექტემბერს პროფესიულ პროგრამებზე სწავლის მსურველებს ტესტირება წიგნიერებასა და რაოდენობრივ წიგნიერებაში ჩაუტარდებათ, ხოლო საბაზო ზოგადი უნარების გამოცდა 7-8 სექტემბერს გაიმართება.

წელს თითოეული ტესტის მაქსიმალური ქულაა 30 და გამოსაცდელს მინიმალური კომპეტენციის ზღვარი გადალახულად ჩაეთვლება მაქსიმალური ქულის 15%-ის დაგროვების შემთხვევაში. ტესტირებისთვის გამოყოფილი დრო შეადგენს 1 საათსა და 30 წუთს.

რაც შეეხება საბაზო ზოგად უნარებს, ტესტის მაქსიმალური ქულაა 50, ტესტურ დავალებებზე სამუშაოდ გამოყოფილი დრო კი 2 საათია.

შეფასებისა და გამოცდების ეროვნულმა ცენტრმა აპლიკანტებს მისცა შესაძლებლობა, ონლაინ რეჟიმში გაევლოთ საცდელი ტესტირება და სახლიდან გაუსვლელად გასცნობოდნენ პროგრამის მოხმარების თავისებურებებსა და ტესტური დავალების ნიმუშებს.

2022 წელს მიღება 600-ზე მეტ პროფესიულ საგანმანათლებლო პროგრამაზეა გამოცხადებული. პროფესიულ ტესტირებაში მონაწილეობის სურვილი 24 500-მდე აპლიკანტმა გამოთქვა. აქედან, შეფასებისა და გამოცდების ეროვნული ცენტრის მიერ ორგანიზებულ ტესტირებას უმაღლეს და საშუალო პროფესიულ საგანმანათლებლო პროგრამებზე ჩარიცხვის მსურველი 9300-ზე მეტი აპლიკანტი გადის, ხოლო 2900-ზე მეტი აპლიკანტი საბაზო პროფესიულ საფეხურზე სწავლის გასაგრძელებლად აბარებს ზოგადი უნარების გამოცდას. რიგ პროფესიულ პროგრამებზე აპლიკანტთა შერჩევა თავად პროფესიული საგანმანათლებლო დაწესებულებების მიერ ხორციელდება“, - ნათქვამია განცხადებაში.

გიორგი კაჭარავა - უკრაინაში ომის მეორე წლისთავზე საქართველოსთვის ცხადად ჩანს, რომ ევროკავშირის და ნატო-ს წევრობა უალტერნატივოა ეროვნული უსაფრთხოებისა და კეთილდღეობისთვის
ბავშვთა მიმართ სექსუალური ხასიათის დანაშაულები და მასთან დაკავშირებული პრობლემები - როგორ ამოვიცნოთ მოძალადე და როგორ უნდა დაეხმაროს მშობელი შვილს მომხდარის გადატანაში? - ფსიქოლოგის რეკომენდაციები
ქართული პრესის მიმოხილვა 22.02.2024
ჰიუნდაი ავტო საქართველოში შერჩეულ მოდელებზე მწარმოებლის ბონუსს მიიღებთ
ტერაბანკის პარტნიორობით, ილიას სახელმწიფო უნივერსიტეტში პრე-აქსელერაციის პროგრამა დასრულდა
ამერიკის შეერთებული შტატების ელჩი საქართველოს უნივერსიტეტს ესტუმრა
მსოფლიოს წამყვანი ტექნოლოგიური კომპანიის, Salesforce-ის ოფიციალური წარმომადგენელი და პარტნიორი კომპანია INSPARK, საქართველოში იწყებს ოპერირებას
ალექსანდრე ჯეჯელავა საუბრობს 8 ცხოვრებისეულ მოლოდინზე, რომელიც ხშირად განგრევთ
სილქნეტის მაღაზიებში „National Geographic საქართველოს“ სპეციალურ ფასად შეიძენთ