გიორგი ვაშაძე - ერთი დიდი უპირატესობა, რაც გვაქვს „ქართულ ოცნებასთან“, არის ის, რომ ჩვენ ვამბობთ, რაც ვართ, ხოლო „ოცნება“ იტყუება - ჩვენ ვართ პროდასავლური ძალები, ერთადერთი მიზნით - დავიბრუნოთ სამშობლო

ერთი დიდი უპირატესობა, რაც ჩვენ გვაქვს „ქართულ ოცნებასთან“, არის ის, რომ ჩვენ ვამბობთ იმას, რაც ვართ, ხოლო „ქართული ოცნება“ იტყუება - ჩვენ არაფრის დამალვა არ გვჭირდება, ჩვენ ვართ ღიად პროევროპული, პროამერიკული, პროდასავლური პოლიტიკური ძალები, რომელთაც ერთადერთი მიზანი გვაქვს, რომ დავიბრუნოთ სამშობლო, - ამის შესახებ „სტრატეგია აღმაშენებელის“ ლიდერმა გიორგი ვაშაძემ ჟურნალისტებთან განაცხადა.

მისი თქმით, ხელისუფლება თამაშობს ევროპას, თუმცა სინამდვილეში პრორუსულ საქმეს აკეთებს.

"ერთადერთი ქვეყანა, სადაც სახელმწიფო მმართველობაში მყოფი ძალა საკუთარი ხალხის წინააღმდეგ ახორციელებს პროპაგანდისტულ რუსულ ჰიბრიდულ ომს, მსოფლიოში ერთადერთი მაგალითი არის საქართველო. ერთი მხრივ, ისინი თამაშობენ ვითომ ევროპას და რეალურად აკეთებენ პრორუსულ საქმეს. "ქართული ოცნება" არის პრორუსული და აქედან უნდა ამოვიდეთ როგორც ქვეყნის შიგნით, ასევე ქვეყნის გარეთ სამოქმედო გეგმის თვალსაზრისით. მე დღეს ვუთხარი ჩვენს პარტნიორებს, რომ ჩვენ ოპოზიციას გვაქვს კოორდინირებული ქმედებების საკმაოდ დიდი ჯაჭვი, რომელსაც ისინი დაინახავენ როგორც ქვეყნის შიგნით, ასევე ქვეყნის გარეთ. გვჭირდება მათი მხარდაჭერა იმისთვის, რომ მიტაცებული სამშობლო, მიტაცებული სახელმწიფო, პრორუსული ძალის, რუსული ჰიბრიდული ძალის იარაღის "ქართული ოცნების" მიერ, დავუბრუნოთ ქართველ ხალხს. ეს არის ამოცანა, რომელიც პროდასავლურ ოპოზიციას აქვს. ერთი დიდი უპირატესობა რაც ჩვენ გვაქვს "ქართულ ოცნებასთან" არის ის, რომ ჩვენ ვამბობთ იმას, რაც ვართ, ხოლო "ქართული ოცნება" იტყუება და მას სჭირდება ჰიბრიდული ომი, ჰიბრიდული იარაღი, შეფარვითი მექანიზმები, რომ მოატყუოს და დააშინოს ქართველი ხალხი. ჩვენ არაფრის დამალვა არ გვჭირდება, ჩვენ ვართ ღიად პროევროპული, პროამერიკული, პროდასავლური პოლიტიკური ძალები, რომელთაც ერთადერთი მიზანი გვაქვს - დავიბრუნოთ სამშობლო", - განაცხადა ვაშაძემ.