ხატია დეკანოიძის განცხადებით, უმრავლესობამ პარლამენტის სხდომაზე სუს-ის ანგარიშის „მიფუჩეჩებით გამოგდება“ გადაწყვიტა
ფრაქცია „ნაციონალური მოძრაობის“ თავმჯდომარის ხატია დეკანოიძის განცხადებით, უმრავლესობამ დღევანდელ პლენარულ სხდომაზე სახელმწიფო უსაფრთხოების სამსახურის ანგარიშის “მიფუჩეჩებით გამოგდება“ გადაწყვიტა.
როგორც დეკანოიძემ ბიუროს სხდომაზე აღნიშნა, მან დღეს მედიით შეიტყო, რომ სუს-ის ანგარიშს ისმენენ.
“ქვეყანას სახელმწიფო უსაფრთხოებასთან დაკავშირებული გამოწვევები ჰქონდა, სადაც სახელმწიფო უსაფრთხოების სამსახურმა არა პრევენციული, არამედ დესტრუქციული როლი ითამაშა. მოგახსენებთ მათ შორის სამსახურის უფროსის ყოფილი მოადგილის დაკავებას და იმ მასალას, რომელიც შემდეგ საზოგადოების თვალსაწიერზე გამოვიდა... ამიტომ ამ ანგარიშის დამალვა და უცებ ასე მიფუჩეჩებით პარლამენტში გამოგდება, ნამდვილად მიზანმიმართულად ხდება. ჩვენ, მათ შორის საზოგადოება დილით არ უნდა იგებდეს იმის შესახებ, რომ სახელმწიფო უსაფრთხოების ანგარიში გამოდის. არსებობს უამრავი პრობლემა სახელმწიფო უსაფრთხოებასთან, რუსეთის მოქალაქეების შემოსვლასთან დაკავშირებით და ასე შემდეგ - რატომ ვიგებთ ჩვენ პრესიდან?“- განაცხადა ხატია დეკანოიძემ ბიუროს სხდომაზე.
კოლეგის პასუხად პარლამენტის თავმჯდონარემ შალვა პაპუაშვილმა აღნიშნა, რომ სუს-ის ანგარიში პარლამენტში აპრილში შევიდა, ივნისში კომიტეტმა განიხილა, ხოლო დღეს პლენარულ სხდომაზე დეპუტატებს შესაძლებლობა ექნებათ სუს-ის უფროსს ყველა კითხვა დაუსვან.
