როგორ შეიძლება სამუშაო ჯგუფი, რომელიც კობახიძეს თავისი პრინციპით აქვს შექმნილი, რაიმე სიკეთეს ემსახურებოდეს - თვითონ კობახიძეს არავინ აღიქვამს სერიოზულად, მათ შორის, არც ევროპარლამენტში, - ამის შესახებ „ლელოს“ გენერალურმა მდივანმა ბადრი ჯაფარიძემ „პალიტრანიუსის“ გადაცემა „პოლიტიკურ სივრცეში“ განაცხადა.

მისი თქმით, „ქართულ ოცნებას“ უნდოდა, რომ საპარლამენტო სამუშაო ჯგუფები მისთვის არასასურველი დეპუტატების, ან არასამთავრობო ორგანიზაციების დასაჩაგრად გამოეყენებინა.

„პარლამენტიდან გამომაძევა „ქართულმა ოცნებამ“, ყველაფერი ნათელია. მტრულად განწყობილი, დესტრუქციული, რადიკალური ძალა არის დღეს ხელისუფლებაში, ამიტომ ჩვენ ამას ვპასუხობთ იმით, რომ ზაფხულში სამოქალაქო სექტორთან ერთად ვიმუშავეთ, შევჯერდით პოზიციებზე ყველა პუნქტთან დაკავშირებით.

კობახიძის მიერ შექმნილი სამუშაო ჯგუფი არ ემსახურებოდა არც დეპოლარიზაციას და არც კონსენსუსის მიღწევას, ხომ ნახეთ გამოაძევეს არასამთავრობო ორგანიზაციები უხეშად. როგორ შეიძლება სამუშაო ჯგუფი, რომელიც კობახიძეს თავისი პრინციპით აქვს შექმნილი, რაიმე სიკეთეს ემსახურებოდეს. „ქართულ ოცნებას“ უნდოდა, რომ სწორედ სამუშაო ჯგუფები გამოეყენებინა მისთვის არასასურველი დეპუტატების, ან არასამთავრობო ორგანიზაციების დასაჩაგრად, გასაძევებლად, ამიტომ არ მიიღო მონაწილეობა ოპოზიციის ნაწილმა. დესტრუქციულობა არის სწორედ „ქართული ოცნების“ მხრიდან ყველა ფეხის ნაბიჯზე.

ოპოზიცია იქცევა სრულად პასუხისმგებლიანად, როდესაც პარლამენტში შემუშავებულია ყველა პუნქტთან დაკავშირებით მკაფიო პოზიცია ევროკავშირის რეკომენდაციების სულისკვეთებასთან და ევროკავშირის მოთხოვნებთან სრულ შესატყვისობაშია.

საპარლამენტო სამუშაო ჯგუფების მუშაობის რეგლამენტი ოპოზიციასთან არავის შეუთანხმებია, „ქართულმა ოცნებამ“ ცალმხრივად გამოაცხადა, მათთვის სასურველი ფორმატით, რომ ოპოზიცია დეკორაციისთვის გამოიყენონ“, - განაცხადა ბადრი ჯაფარიძემ.