ანა წითლიძე წულუკიანს - კარგად დაიწყეთ, მაგრამ ისე დაასრულეთ, როგორც გჩვევიათ - ბოღმით

უზრდელობაში ვერ შეგეჯიბრებით, რადგან ეს თქვენი დამსახურებული სტატუსია - ამხელა კულტურის მინისტრმა და ვიცე-პრემიერმა ქალმა უნდა იცოდეთ, რომ სიტყვის, რომელიც თქვენ ყველაზე ხშირად ახსენეთ დღეს, სწორი ფორმა არის „ტყუილი“ და არა „ტყვილი“, - ასე მიმართა „ნაციონალური მოძრაობის“ წევრმა ანა წითლიძემ კულტურის მინისტრს თეა წულუკიანს პარლამენტში „მინისტრის საათის“ ფორმატში სიტყვით გამოსვლისას.

მან მიმართა, მინისტრს, რომ შემდეგში აღნიშნული წესი გაითვალისწინოს.

„ქალბატონო თეა, კარგად დაიწყეთ, მაგრამ ისე დაასრულეთ, როგორც გჩვევიათ - ბოღმით. ჩემი მიზანი არ არის არც ბოღმაში აყოლა, არც პოლემიკაში შემოსვლა, მითუმეტეს უზრდელობაში ვერ შეგეჯიბრებით, რადგან ეს თქვენი დამსახურებული სტატუსია. ამხელა კულტურის მინისტრმა და ვიცე-პრემიერმა ქალმა უნდა იცოდეთ, რომ სიტყვის, რომელიც თქვენ ყველაზე ხშირად ახსენეთ დღეს, სწორი ფორმა არის „ტყუილი“ და არა „ტყვილი“. ამიტომაც, როდესაც ადამიანებს პროფესიონალიზმს უწუნებთ, გაითვალისწინეთ შემდეგში, რომ არ შერცხვეთ. ელემენტარული გრამატიკული წესია“, - განაცხადა წითლიძემ.